haiñ is havā meñ kyā kyā barsāt kī bahāreñ
sabzoñ kī lahlahāhaT bāġhāt kī bahāreñ
bādal havā ke uupar ho mast chhā rahe haiñ
jhaḌiyoñ kī mastiyoñ se dhūmeñ machā rahe haiñ
maare haiñ mauj Dābar dariyā dauñD rahe haiñ
mor-o-papīhe koyal kyā kyā rumañD rahe haiñ
jañgal sab apne tan par hariyālī saj rahe haiñ
gul phuul jhāḌ-būTe kar apnī dhaj rahe haiñ
bādal lagā Takoreñ naubat kī gat lagāveñ
jheñgur jhañgār apnī surnā.iyañ bajāveñ
har jā bichhā rahā hai sabza hare bichhaune
qudrat ke bichh rahe haiñ har jā hare bichhaune
sabzoñ kī lahlahāhaT kuchh abr kī siyāhī
aur chhā rahī ghaTā.eñ surḳh aur safed kaahī
kyā kyā rakhe haiñ yārab sāmān terī qudrat
badle hai rañg kyā kyā har aan terī qudrat
koyal kī kuuk meñ bhī terā hī naam haigā
aur mor kī zaTal meñ terā payām haigā
bolīñ ba.e baTereñ qumrī pukāre kū-kū
pī pī kare papīhā bagule pukāreñ tū-tū
jo mast hoñ idhar ke kar shor nāchte haiñ
pyāre kā naam le kar kyā zor nāchte haiñ
phūloñ kī sej uupar sote haiñ kitne ban-ban
so haiñ gulābī joḌe phūloñ ke haar abran
jo ḳhush haiñ vo ḳhushī meñ kaaTe haiñ raat saarī
jo ġham meñ haiñ unhoñ par guzre hai raat bhārī
jo vasl meñ haiñ un ke juuḌe mahak rahe haiñ
jhūloñ meñ jhūlte haiñ gahne jhamak rahe haiñ
ab birhanoñ ke uupar hai saḳht be-qarārī
har buuñd mārtī hai siine upar kaTārī
jab koyal apnī un ko āvāz hai sunātī
sunte hī ġham ko maare chhātī hai umñDī aatī
hai jin kī sej suunī aur ḳhālī chārpā.ī
ro ro unhoñ ne har-dam ye baat hai sunā.ī
kitnoñ ne apnī ġham se ab hai ye gat banā.ī
maile kuchaile kapḌe āñkheñ bhī DabDabā.ī
gaatī hai giit koī jhūle pe kar ke pherā
maaro jī aaj kījiye yaañ rain kā baserā
aur jin ko ab muhayyā husnoñ kī Dheriyāñ haiñ
surḳh aur sunahre kapḌe ishrat kī gheriyāñ haiñ
kitne to bhañg pī pī kapḌe bhigo rahe haiñ
bāheñ guloñ meñ Daale jhūloñ meñ so rahe haiñ
baiThe haiñ kitne ḳhush ho ūñche chhuā ke bangle
piite haiñ mai ke pyāle aur dekhte haiñ jañgle
kitnoñ ko mahloñ andar hai aish kā nazārā
yā sā.ebān suthrā yā baañs kā usārā
chhat girne kā kisī jā ġhul shor ho rahā hai
dīvār kā bhī dhaḌkā kuchh hosh kho rahā hai
muddat se ho rahā hai jin kā makāñ purānā
uTh ke hai un ko meñh meñ har aan chhat pe jaanā
koī pukārtā hai lo ye makān Tapkā
girtī hai chhat kī miTTī aur sā.ebān Tapkā
ūñchā makān jis kā hai pach khanā sivāyā
uupar kā khan Tapak kar jab paanī nīche aayā
sabzoñ pe biir bhūTī Tīloñ upar dhatūrē
pissū se machchharoñ se ro.e koī basore
phuñsī kisī ke tan meñ sar par kisī ke phoḌe
chhātī ye garmī daane aur piiTh meñ daroḌe
patlī jahāñ kisī ne daal aur kaḌhī pakā.ī
makkhī ne vohīñ bolī aa uuñT kī bulā.ī
jis gul-badan ke tan meñ poshāk sausanī hai
so vo parī to ḳhāsī kālī-ghaTā banī hai
badanoñ meñ khab rahe haiñ ḳhūboñ ke laal joḌe
jhamkeñ dikhā rahe haiñ pariyoñ ke laal joḌe
aur jis sanam ke tan meñ joḌā hai zāfrānī
gulnār yā gulābī yā zard surḳh dhānī
koī to jhūlne meñ jhūle kī Dor chhoḌe
yā sāthiyoñ meñ apne paañv se paañv joḌe
kitnoñ ko ho rahī hai us aish kī nishānī
sote haiñ saath jis ke kahtī hai vo siyānī
kitne sharāb pī kar ho mast chhak rahe haiñ
mai kī gulābī aage pyāle chhalak rahe haiñ
haiñ jin ke tan mulā.em maide kī jaise loī
vo is havā meñ ḳhāsī oḌhe phire haiñ loī
kitne phire haiñ oḌhe paanī meñ surḳh paTTū
jo dekh surḳh badlī hotī hai un pe laTTū
jo is havā meñ yaaro daulat meñ kuchh baḌhe haiñ
hai un ke sar pe chhatrī hāthī pe vo chaḌhe haiñ
hai jin kane muhayyā pakkā pakāyā khānā
un ko palañg pe baiThe jhaḌiyoñ kā ḳhat uḌānā
kitne ḳhushī se baiThe khāte haiñ ḳhush mahal meñ
kitne chale haiñ lene baniye se qarz pal meñ
jo kasbiyāñ javāneñ husnoñ meñ purtiyāñ haiñ
sīnoñ meñ laal añgiyāñ aur laal kurtiyāñ haiñ