zindagī tū mujhe kis moḌ pe le aa.ī hai
ḳhvāb khulte the jahāñ barf vahāñ chhā.ī hai
sau darīche haiñ magar sham.a kisī par bhī nahīñ
chāñd nikle mirī rātoñ kā muqaddar bhī nahīñ
log gūñge haiñ bayābāñ meñ azaañ kaise ho
log qātil haiñ ilāj-e-ġham-e-jāñ kaise ho
raat jab ḳhatm huī thī to sahar lagtī thī
raushnī rāhguzar rāhguzar lagtī thī
kuchh bhī āñkhoñ meñ nahīñ ashk-e-nadāmat ke sivā
kuchh bhī dāman meñ nahīñ dāġh-e-malāmat ke sivā