aqallīyat kahīñ kī ho tah-e-ḳhanjar hī rahtī hai

halākat-ḳhez hāthoñ ke hazāroñ jabr sahtī hai

na koī ḳhvāb āñkhoñ meñ na dil meñ aasrā koī

na jū-e-ḳhūñ se bachne kā nazar meñ rāsta koī

ḳhud apnī hī fazā meñ ḳhauf kā ehsās har lamha

adam-mahfūziyat kā duur tak ġhamnāk sannāTā

haqārat kī nazar nafrat kī chiñgārī ta.āqub meñ

musībat aage aage zillat-o-ḳhvārī ta.āqub meñ

zabāñ ma.atūb tahzīb-o-saqāfat daar kī zad meñ

ghar āñgan izzat-o-nāmūs kul talvār kī zad meñ

aqallīyat jahāñ bhī hai yahī us kā muqaddar hai

ye zaḳhmī be-amāñ maḳhlūq har sū zer-e-ḳhanjar hai