shikasta huuñ magar daulat bhī hai hāsil huī ham ko

guzāre saath jo pal qadr us kī ho nahīñ kis ko

yahī yādeñ haiñ le jā.eñgī ham ko āḳhrī dam tak

na koī ham-safar hogā na jā.egā koī ghar tak

hai khelī pyaar kī baazī na jiitā maiñ na tum haarī

lagā.egī ye duniyā zarb apne dam se hī kaarī

mile ham ittifāqan the magar rāheñ lagīñ yaksāñ

kabhī dushvāriyāñ apnī kabhī manzil rahī pinhāñ

ye hāthoñ kī lakīreñ ba.az ā.eñgī kahāñ dilbar

inheñ to bair hai ham se karam-farmā raqīboñ par

mujhe hai ye yaqīñ pāoge tum apnī na.ī manzil

maiñ taḌpūñ yā karūñ girya nahīñ hogā koī hāsil