raah meñ chalte hue bhiiḌ se uktā.e hue

terī āvāz sunī maiñ ne ka.ī saal ke ba.ad

soch kar zehn pareshān rahā der talak

shahr ke shor-e-ḳhurāfāt ke hañgāmoñ meñ

terī āvāz jo aa.ī to kahāñ se aa.ī

phir kisī vahm ke narġhe meñ to maiñ aa na gayā

terī āvāz kā sargam kahīñ dhokā to nahīñ

der tak zehn savālāt meñ uljhā hī rahā

koī ummīd na jis baat kī thī kaise huī

kaise pathrā.ī huī aañkh meñ aañsū aa.e

kaise phir bhūlā huā qissa tujhe yaad aayā

raah meñ chalte hue bhiiḌ se uktā.e hue

terī āvāz sunī maiñ ne ka.ī saal ke ba.ad

terī āvāz kā dhokā hai agar vahm mirā

mujh ko rahnā hai isī vahm kī sarshārī meñ

terī āvāz ke dhoke se ye mahsūs huā

koī ḳhvāhish ho tamannā ho bahaktī hai zarūr

ab bhī siine meñ koī chiiz dhaḌaktī hai zarūr