bahār-e-be-ḳhizāñ dillī pe qurbāñ
nishāt-e-jāvedāñ dillī pe qurbāñ
mirā dil merī jaañ dillī pe qurbāñ

yahāñ har ḳhaar sarv-o-yāsman hai
yahāñ har jaada āġhosh-e-chaman hai
mirā dil merī jaañ dillī pe qurbāñ

mahaktī vādiyāñ rañgīñ nazāre
nazāroñ meñ mohabbat ke ishāre
mirā dil merī jaañ dillī pe qurbāñ

vo ThanDī raat vo aariz vo gesū
fazā meñ pur-fishāñ sāñsoñ kī ḳhushbū
mirā dil merī jaañ dillī pe qurbāñ

salone hoñT aur va.ade suhāne
nigah ma.asūm aur kamsin nishāne
mirā dil merī jaañ dillī pe qurbāñ

mire ahd-e-mohabbat kī nishānī
salonī sāñvlī gul-rañg dhānī
mirā dil merī jaañ dillī pe qurbāñ