ba.ad gāñdhī ke na sun ham ne samāñ dekhā kyā
fasl-e-gul aate hī har bāġh-o-chaman ujḌā kyā
zindagī maut se bad-tar ho to phir jiinā kyā

bhuuk se dāman-e-hastī ko siye jaate haiñ
zindagī chhīn ke auroñ ke jiye jaate haiñ
jab ye piine hī par aa jaa.eñ to phir dariyā kyā

husn bhī ġhamza-o-andāz-o-adā bhuul gayā
ishq bhī jalva-e-rañgīñ kī ziyā bhuul gayā
kārvāñ manzil-e-maqsūd pe pahuñchātā kyā

ye jo aa.ī hai hamāre hī lahū kī hai bahār
ye jo uḌtā hai hamāre hī diloñ kā hai ġhubār
bazm-e-mātam meñ jo chheḌe to koī naġhma kyā

ḳhirman-e-zulm ko ab aag lagā de koī
chāñd-tāroñ ke charāġhoñ ko bujhā de koī
zulm dhāte haiñ ahinsā ke pujārī kyā kyā