maiñ tujhe phuul kahūñ aur kahūñ bhañvaroñ se

aao us phuul kā ras chuus ke nācho-jhūmo

maiñ tirī aañkh ko tashbīh duuñ maiḳhāne se

aur ḳhud zahr-e-judā.ī kā talabgār rahūñ

mujh se ye tere qasīde na likhe jā.eñge

mujh se tere liye ye ġhazleñ na kahī jā.eñgī

tujh ko shahr kī zarūrat hai mohabbat kī mujhe

ai hasīna tirī manzil mirī manzil meñ nahīñ

dekh ke ġhair ke pahlū meñ tujhe raqs-kunāñ

bhiig jaatī hai mirī aañkh sarishk-e-ġham se

mujh ko bhañvrā na samajh mujh ko patañgā na samajh

mujh ko insān samajh merī sadāqat se na khel