sar chaḌh ke boltā hai urdu zabāñ kā jaadū
hindostāñ kī miTTī ke āsmāñ kā jaadū
jap-jāp jogiyoñ kā na.ara qalandaroñ kā
tahzīb mahfiloñ kī aur shor mai-kadoñ kā
dariyā haiñ 'mīr'-o-'ġhālib' har lab pe jo ravāñ haiñ
'faiz' o 'firāq' aur 'dāġh' har dil pe hukmarāñ haiñ
duniyā dil-e-ghazal meñ mai-ḳhāna ishq kā hai
har ruuh vajd meñ hai har jism meñ nasha hai
TuuTe hue diloñ ko joḌe rafūgarī se
joḌe tamām girheñ jazboñ kī sādgī se
hindostāñ kā jaadū saare jahāñ kā jaadū
hindostāñ kā jaadū urdu zabāñ kā jaadū