tujh ko ma.alūm nahīñ tujh ko bhalā kyā ma.alūm

tere chehre ke ye saada se achhūte se nuqūsh
merī taḳh.īl ko kyā rañg atā karte haiñ
tere qāmat kā lachaktā huā maġhrūr tanāv
jaise phūloñ se ladī shāḳh havā meñ lahrā.e
ḳhalvat-e-bazm ho yā jalvat-e-tanhā.ī ho
terā paikar mirī nazroñ meñ ubhar aatā hai
chalte chalte jo qadam aap ThiThak jaate haiñ
sochtā huuñ ki kahīñ tū ne pukārā to nahīñ
dhuup meñ saaya bhī hotā hai gurezāñ jis dam
terī zulfeñ mire shānoñ pe bikhar jaatī haiñ
jaane kyuuñ tujh se dil-e-zār ko itnī hai lagan
kaisī kaisī na tamannāoñ kī tamhīd hai tū
apnī dīvāngi-e-shauq pe hañstā bhī huuñ maiñ
aur phir apne ḳhayālāt meñ kho jaatā huuñ
kis ko ma.alūm mire ḳhvāboñ kī ta.abīr hai kyā
kaun jaane ki mire ġham kī haqīqat kyā hai
tujh ko ma.alūm nahīñ tujh ko na hogā ma.alūm

tere chehre ke ye saada se achhūte se nuqūsh
merī taḳh.īl ko kyā rañg atā karte haiñ