chaar jānib hai yahī shor divālī aa.ī
sāl-e-māzī kī tarah laa.ī hai ḳhushiyāñ imsāl
har bashar mahv hai is jashn kī tayyārī meñ
taaki ḳhushiyoñ kā qamar aur ziyā-baḳhsh hai
utar aa.e haiñ zamīñ par bhī falak se taare
dāman-e-charḳh meñ ai dosto kyā rakkhā hai
sāf-shaffāf chamakte hue pur-nūr makāñ
sehn-e-gulshan meñ khile jaise hoñ rañgīn gulāb
mujh ko bhātī nahīñ vallāh maiñ sach kahtā huuñ
zāhirī aur dikhāve kī sajāvaT yaaro
ham ne ajdād kī ādāt bhulā rakkhī haiñ
un kī nazroñ meñ to har qaum barābar thī kañval
dasht meñ raam ne shabrī kī ziyāfat khaa.ī
bhīlnī ke yahāñ khāne meñ bhī inkār na thā
raam kī fauj meñ har qaum ke afrād na the
kyā hanūmān na the fauj kī un kī sālār
kyā tumheñ chhūt kā ye dars buzurgoñ ne diyā
kyā tumheñ firqa-parastī kī ijāzat dī thī
merā kahnā hai yahī hind ke bāshindoñ se
qalb kī apne safā.ī karo pahle yaaro
ab to ulfat ke charāġhoñ ko jalā kar pahle
ghar meñ har ik ke na.ī jot jagānā hai tumheñ
mujh ko ḳhvāhish hai usī shaan kī dīvālī kī
laxmī desh meñ ulfat kī shab-o-roz rahe