ajiib kūcha-e-rashk-e-jināñ thā dehlī kā

bahisht kahte haiñ jis ko makāñ thā dehlī kā

dimāġh bar-sar-e-haft-āsmāñ thā dehlī kā

ḳhitāb-e-ḳhitta-e-hindostāñ thā dehlī kā

ġhazab hai us ko koī shādmāñ na dekh sakā

zamīñ na dekh sakī āsmāñ na dekh sakā

hazāroñ zulf-e-parī-vash ke yaañ the saudā.ī

hazāroñ mai-kash-o-mai-ḳhvār-o-mast-o-sahbā.ī

sharāb-e-aish pilātā thā charḳh-e-mīnā.ī

qubūl karte the is dar pe sab jabīñ-sā.ī

jo aatā thā so vo ho rahtā thā usī ghar kā

zamīñ kī naaf hai ka.aba hai batn-e-mādar kā

vo taḳht-e-saltanat-o-bārgāh-e-sultānī

ki jis meñ baiThte the aa ke zill-e-sub.hānī

paroñ se sar pe humā kartā thā magas-rānī

bajā us auj pe thā da.avā-e-sulaimānī

har ek qasr ko da.avā thā tāq-e-kisrā kā

dimāġh arsh pe thā qila-e-muallā kā

zuhal kī aañkh paḌī ittifāq se nāgāh

tamām ho gayā tārāj mulk-o-māl aur jaah

ki us se ho ga.e bad-tar ġharīb shāhanshāh

ra.ī.yat us kī huī us se bhī ziyāda tabāh

vo sāhūkār na thā jis kī saakh meñ baTTā

ab us ke naam pe lagtā hai laakh meñ baTTā

milā ye hukm ki sab log yaañ se Tal jaa.eñ

isī meñ ḳhair hai jo shahr se nikal jaa.eñ

dabī hai buqchī to dikhlā ke yaañ baġhal jaa.eñ

jo kuchh hai chhoḌ yahāñ sāhab-e-daval jaa.eñ

na sar pe Topī hai un ke na paañv meñ juutī

baġhal meñ tote kā piñjḌā nabī-jī bhejo jī

yahāñ jo aan kī dekhī to daar kī sūrat

vo daar kahiye jise zulfiqār kī sūrat

miTā dī chashm-e-zadan meñ hazār kī sūrat

nazar paḌī na kisī be-qarār kī sūrat

ba-rañg-e-tīr-e-shahāb aag meñ jale lākhoñ

sipurd dār-o-rasan ho ga.e gale lākhoñ