maiñ is ḳhayāl meñ thā bujh chukī hai ātish-e-dard
bhaḌak rahī thī mire dil meñ jo zamāne se
vo ek shola-e-dard-āfrīñ matā-e-hayāt
maiñ is ḳhayāl meñ thā maiñ use bachā na sakā
maiñ sochtā thā ki shāyad bhulā chukā huuñ tujhe
jo apne dil kī kahānī tujhe sunānā thī
kuchh aisā mujh ko gumāñ thā tufail-e-marham-e-vaqt
koī bhī ghaav ho ik roz bhar hī jaatā hai
jo haiñ rafīq-e-dil-o-jān un āñsuoñ kī qasam
tire huzūr abhī tak jo baar pā na sake
milā huuñ aaj maiñ tujh se to vasvase ye tamām
miTe ḳhayāl kī duniyā se misl-e-naqsh-bar-āb
guzar ga.ī tirī furqat meñ zindagī jitnī
adn kī sub.h ki paris kī raat meñ guzrī
aur aaj merī nadāmat kā ye shadīd ehsās
har ek saañs meñ mujh se savāl kartā hai