mire vatan tirī ḳhidmat meñ le kar aayā huuñ
jagah jagah ke tilismāt des des ke rañg
bichhaḌ ke tujh se ka.ī ajnabī dayāroñ ne
mujhe gale se lagāyā mujhe tasallī dī
mire dayār kahāñ the tire tamāshā.ī
ki dīdanī thā mirā jashn-e-ābla-pā.ī
talāsh karte hue gum-shuda ḳhazānoñ ko
bahut se misr ke fir.aun maqbaroñ meñ mile
sunā ke apne urūj-o-zavāl ke qisse
sabhī ne mujh se mirā rañg-e-dāstāñ pūchhā
mirī jhukī huī āñkheñ talāsh kartī raheñ
koī zamīr kā lahja koī usuul kī baat
mire vatan mire sāmān meñ to kuchh bhī nahīñ
bas ek ḳhvāb hai aur ḳhvāb kī fasīleñ haiñ