Tags-Delhi

jo makīñ rah ga.e be-gor-o-kafan mar mar kar
Dhāñpne par vo gire un kā makān-e-dehlī

jaise fāras meñ ḳhulāsa hai zabān-e-shīrāz
vaisī hī hind meñ hai paak zabān-e-dehlī

bas-ki hañgāma-talab thā ye vahāñ pahle se
fitna-e-hashr bhī hovegā miyān-e-dehlī

ham to insān haiñ jī kyūñki rahe bin ro.e
ki farishte bhī hue marsiya-ḳhvān-e-dehlī

jasad-e-charḳh na anjum se bane ābla-vār
gar na ho darpai barbādī-e-shān-e-dehlī

sahme sahme na raheñ kyūñki muqīmān-e-falak
ki falak hai hadaf-e-tīr-e-fuġhān-e-dehlī

is kī vīrānī meñ ik baat hai dekho ab tak
miT ga.e par bhī to baaqī rahī ān-e-dehlī

miT ga.e haa.e makīñ aur makān-e-dehlī
na rahā naam ko bhī nām-o-nishān-e-dehlī

fart-e-kāhīdgī-e-dard se yārab ab to
sab ke sab ho ga.e haiñ piir javān-e-dehlī

'ġhālib'-o-'sāqib'-o-'sālik' hī nahīñ haiñ ġhamgīñ
'kaukab'-e-ḳhasta bhī kartā hai fuġhān-e-dehlī

duur se dekh ke ho kyūñki yaqīñ dillī kā
aa ke dillī meñ ho jab yuuñ hī gumān-e-dehlī

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge

na thā shahr-e-dehlī ye thā chaman kaho kis tarah kā thā yaañ aman
jo ḳhitāb thā vo miTā diyā faqat ab to ujḌā dayār hai

ab na vo ahbāb zinda haiñ na rasm-ul-ḳhat vahāñ
ruuTh kar urdu to dehlī se dakan meñ aa ga.ī

shahr-e-lahore se kuchh duur nahīñ hai dehlī
ek sarhad hai kisī vaqt bhī miT saktī hai

vo 'valī' terā hī ik farzand hai ḳhāk-e-vatan
jis kī azmat ne kiyā dehlī meñ āġhāz-e-suḳhan

raunaq-e-hazrat-e-dehlī thī usī ke dam se
ba.ad marne ke khulī sab pe 'zafar' kī ḳhūbī

thā 'zauq' pahle dehlī meñ punjab kā sā husn
par ab vo paanī kahte haiñ multān bah gayā

dimāġh bar-sar-e-haft-āsmāñ thā dehlī kā
ḳhitāb-e-ḳhitta-e-hindostāñ thā dehlī kā

ajiib kūcha-e-rashk-e-jināñ thā dehlī kā
bahisht kahte haiñ jis ko makāñ thā dehlī kā