Tags-Dil

kab khelne pakaḌ ke havā meñ se laa.e vo
jugnū jo aah dal ke sharāre hue to kyā

zaḳhm-e-dil ham ne sajā.e to idhar bhī us ne
nāz-o-andāz se jaarī sitam-ārā.ī kī

shukr hai ai shab-e-hijrāñ ki baḌī muddat par
ho ga.ī dil se mulāqāt bhī bīnā.ī kī

mire darīcha-e-dil meñ Thahar na jaa.e kahīñ
vo ek ḳhvāb ki jis ko sitāra karnā hai

dil meñ jab terī lagan raqs kiyā kartī thī
merī har saañs meñ ḳhushbū sī basā kartī thī

tumhāre ba.ad kahīñ aur dil lagānā thā
tumhāre ba.ad ye mohlat nahīñ milī ab tak

'nazīr' aisā jo chanchal dilrubā bahrūpiyā hove
tamāshā hai phir aise shoḳh se saude kā paT jaanā

hijr ke bādal chhaTe to vasl kī taqvīm meñ
dil huvaidā ho rahā hai gulsitānī rañg kā

hai sub.h se kuchh aaj mire dil ko bashāshat
us kūche se qāsid to na ḳhat le ke chalā ho

sharāb pī jaan tan meñ aa.ī alam se thā dil kabāb kaisā
gale se lag jaao aao sāhab kahāñ kā parda hijāb kaisā

baḌhā jo maiñ rakh ke uzr-e-mastī kahā ye hañs kar chaḌhā ke tevrī
haTo zarā hosh meñ raho jī sambhālo dil iztirāb kaisā

nahīñ hai dozaḳh kā dil ko kuchh ġham mirī bhī sun nāsehā zarā tham
rahīm vo pur-gunāh haiñ ham azaab kaisā savāb kaisā

is liye dil burā kiyā hī nahīñ
zindagī merā faisla hī nahīñ

tū ne kis dil ko dukhāyā hai tujhe kyā ma.alūm
kis sanam-ḳhāne ko Dhāyā hai tujhe kyā ma.alūm

mirā chāk-e-girebāñ chāk-e-dil se milne vaalā hai
magar ye hādse bhī besh o kam hote hī rahte haiñ

kuchh bhī ho vo ab dil se judā ho nahīñ sakte
ham mujrim-e-tauhīn-e-vafā ho nahīñ sakte

ḳhud apne dil kā ḳhuun fazā meñ uchhāl ke
mazmūñ likhe haiñ ham ne firāq o visāl ke

dāġh-e-dil naqsh hai ik lāla-e-sahrā.ī kā
ye asāsa hai mirī bādiya-paimā.ī kā

jo sach pūchho hasīnoñ kā hayā ne rakh liyā parda
nikal chalte gharoñ se ye to hotī dil-lagī achchhī

mohabbat ke maze se dil nahīñ hai āshnā jis kā
na us kī zindagī achchhī na us kī maut hī achchhī