Tags-Dil

āshiq samajh rahe haiñ mujhe dil lagī se aap
vāqif nahīñ abhī mire dil kī lagī se aap

dil bhī kabhī milā ke mile haiñ kisī se aap
milne ko roz milte haiñ yuuñ to sabhī se aap

ab ghūrne se fā.eda bazm-e-raqīb meñ
dil par chhurī to pher chuke be-ruḳhī se aap

dil to nahīñ kisī kā tujhe toḌte haiñ ham
pahle chaman meñ pūchh leñ itnā kalī se aap

'beḳhud' yahī to umr hai aish o nashāt kī
dil meñ na apne tauba kī Thāneñ abhī se aap

hāl-e-dil mujh se na pūchho mirī nazreñ dekho
raaz dil ke to nigāhoñ se adā hote haiñ

milne ko yuuñ to milā kartī haiñ sab se āñkheñ
dil ke aa jaane ke andāz judā hote haiñ

bhulāne baiThī huuñ saarī duniyā dhaḌak rahā hai vo mere dil meñ
jo dūriyāñ haiñ samundaroñ kī vo fāsla hai bas ik sadā kā

nasīboñ se koī gar mil gayā hai
to pahle us pe apnā dil gayā hai

jī hech jaan hech na dil ne jigar aziiz
sab se sivā hai vasl tirā fitna-gar aziiz

rahne na de jo vahshat-e-dil hī to kyā karūñ
vo kaun hai ki jis ko nahīñ apnā ghar aziiz

husn o ulfat meñ ḳhudā ne rabt paidā kar diyā
dard-e-dil mujh ko diyā tum ko masīhā kar diyā

ḳhuub kī taqsīm tū ne ai ḳhayāl-e-zulf-e-yār
dil ko nazr-e-dāġh sar ko vaqf-e-saudā kar diyā

mujh ko shikva hai ki dil kā ḳhuun qātil ne kiyā
dil ye kahtā hai mujhe qatre se dariyā kar diyā

dil idhar ruḳhsat huā hosh us taraf chalte hue
kis kī āñkhoñ ne ye dar-parda ishārā kar diyā

maiñ kahāñ chāhat kahāñ ye sab karishme dil ke haiñ
tum pe ḳhud shaidā huā mujh ko bhī shaidā kar diyā

dil taḌaptā hai to kuchh taskīn hotī hai 'jalīl'
jī bahalne ko ḳhudā ne dard paidā kar diyā

kho chukā hai us ko jab to ḳhud hī ai sultān-'rashk'
ab dhaḌaktā hai dil-e-be-mudda.ā kis ke liye

haiñ teġh-e-nāz-e-yār ke bismil alag alag
siine meñ haiñ tapāñ jigar-o-dil alag alag

makr-o-nifāq ishq se muddat talak rahā
maiñ dil se aur mujh se mirā dil alag alag