Tags-Dil

phir tair ke mere ashkoñ meñ gul-posh zamāne lauT chale
phir chheḌ ke dil meñ Tīsoñ ke sañgīt ga.ī rut biit ga.ī

ye lāla-o-gul kyā pūchhte ho sab lutf-e-nazar kā qissa hai
rut biit ga.ī jab dil se kisī kī piit ga.ī rut biit ga.ī

dil ke sahrā meñ chalī sard havā
abr gulzār pe barsā hogā

nahīñ bāzār-e-mohabbat meñ ḳharīdārī-e-dil
chhān Daalī hai har ik maiñ ne dukān-e-dehlī

ghis ke sandal kā lagānā jinheñ dard-e-sar thā
dil pe rakhte haiñ vo andoh-e-garān-e-dehlī

ḳhaak jal-bhun ke to ho jā.egā charḳh-e-bad-bīñ
naala kar baiThe jo dil-soḳhtgān-e-dehlī

dil arsh-gāh-e-husn hai dil jalva-gāh-e-nāz
ye aap hī kā ghar hai hamārī guzar kahāñ

dil parbatoñ ke paar na chal de havā ke saath
bādal banā na de mirī ḳhū-e-safar mujhe

musāfir pe ḳhud se bichhaḌne kī rut
vo jab ghar ko lauTe bahut dil dukhe

ajab aañch hai dil ke dāman talak
koī aag jaise havā meñ bahe

dard-e-duniyā kī taḌap dil meñ mire rahne de
tū to āñkhoñ meñ bhī rah saktī hai terā kyā hai

kuchh to kah ai dil-e-betāb irāde kyā haiñ
nāma-bar jā.egā le kar mirā paiġhām ki tū

ik dāġh-e-dil pe bhī ab apnā nahīñ tasarruf
ye sab zamīn goyā sarkārī ho ga.ī hai

is bojh kī na pūchho gaThrī hai dil ye jis ko
jitnā kiyā hai halkā kuchh bhārī ho ga.ī hai

ham soz-e-dil bayāñ kareñ tum se kahāñ talak
jalne lagī hai ab to hamārī zabāñ talak

kis muñh se ham bayān kareñ mājrā-e-dil
un ko nahīñ pasand hai soz-e-nihāñ talak

mutlaq nahīñ hai 'kaif' ko da.avā-e-jazb-e-dil
maqdūr is kā girya-o-āh-o-fuġhāñ talak

dil meñ aag lagā jaatā hai ye bin yaar bahār kā mausam
ek tapish bhī hotī hai is ThanDī sī phuvār ke pīchhe

terā to ik dil TuuTā hai yaar 'qatīl' udaas na ho tū
log to jaañ bhī de dete haiñ pyāre apne yaar ke pīchhe

jaañ hai to fikr-e-ishrat-e-bazm-e-jahāñ bhī hai
kab dil se dard-e-ālam-e-imkāñ judā huā