Tags-Dil

jin kī yādoñ se raushan haiñ merī āñkheñ
dil kahtā hai un ko bhī maiñ yaad aatā huuñ

sirisht-e-dil meñ kis ne kuuT kar bhar dī hai betābī
azal meñ kaun yā rab mujh se baiThā thā ḳhafā ho kar

tū jo is duniyā kī ḳhātir apnā-āp gañvātā hai
ai dil-e-man ai mere musāfir kaam hai ye nā-dānoñ kā

vo dilbarī kā us kī jo kuchh haal hai so hai
aur apnī dil-dahī kā jo ahvāl hai so hai

shikva mujhe to sozan-e-mizhgāñ se kuchh nahīñ
dil ḳhaar ḳhaar aah se ġhirbāl hai so hai

naqsh-e-qadam kī tarah 'hasan' us kī raah meñ
apnā ye dil sadā se jo pāmāl hai so hai

kabhī ishq karo aur phir dekho is aag meñ jalte rahne se
kabhī dil par aañch nahīñ aatī kabhī rañg ḳharāb nahīñ hotā

mire dil ne vo naala paidā kiyā hai
jaras ke bhī jo hosh khotā rahegā

nikāl laayā huuñ ek pinjre se ik parinda
ab is parinde ke dil se piñjra nikālnā hai

rah-rav-e-rāh-e-mohabbat kaun sī manzil meñ hai
dil hai be-zār-e-mohabbat aur mohabbat dil meñ hai

kyā zabāñ par hai kisī kī kyā kisī ke dil meñ hai
jis kī mahfil hai vahī jaane vo jis mushkil meñ hai

ye jism tañg hai siine meñ bhī lahū kam hai
dil ab vo phuul hai jis meñ ki rañg-o-bū kam hai

tujh ko khā jā.egā ai 'mus.hafī' ye ġham ik roz
dil ke jaane kā tū itnā bhī na ġham khāyā kar

bujhā sā rahtā hai dil jab se haiñ vatan se judā
vo sehn-e-bāġh nahīñ sair-e-māhtāb nahīñ

vo bāġh-o-rāġh ke dil-chasp-o-dil-nashīñ manzar
ki jin ke hote hue ḳhuld misl-e-ḳhvāb nahīñ

haa.e dam bhar bhī dil Thahar na sakā
haath siine pe koī dhar na sakā

rah gayā aañkh meñ nazākat se
dil meñ naqsha tirā utar na sakā

aag aisī lagī thī siine meñ
aañkh se dil meñ vo utar na sakā

mirā dil bhī muamma ho gayā hai
bharī-mahfil meñ tanhā ho gayā hai

koī bhī shai qarīne se nahīñ hai
ajab dil kā gharauñdā ho gayā hai