Tags-Dil

mahsūs ho rahī haiñ baḌhī dil kī dhaḌkaneñ
antim paḌāv ho na mirā aap ḳhush raheñ

dil hai dozaḳh meñ kuchh is tarah tabassum-bar-lab
jaise kāñToñ meñ koī phuul khilā hotā hai

zindagī kā kyā hasīñ anjām hai
dil meñ terī yaad lab par naam hai

ghabrā.ūñ kis tarah dil-e-pur-āh se na maiñ
us soḳhta ne ab to nihāyat dhuāñ kiyā

yārab tū us ke dil se sadā rakhiyo ġham ko duur
jis ne kisī ke dil ko kabhī shādmāñ kiyā

ḳhūboñ ko ham-nashīñ tū kabhī dil na dījiyo
maiñ is muāmle meñ bahut sāziyāñ kiyā

āsmānī balā.eñ nāzil kar
ai ḳhudā dil meñ terā Dar jaage

ab vo hujūm-e-shauq kī sarmastiyāñ kahāñ
māyūsi-e-firāq ne dil hī bujhā diyā

kis muñh se ham us ko samjhāte 'afsar'
dil kā bojh uThā nahīñ paa.e ham bhī to

baḌā shor sunte the pahlū meñ dil kā
jo chīrā to ik qatra-e-ḳhūñ na niklā

'prem' is yug kī sāl-girah par aur bhalā kyā tohfa dete
chāñd kī dilkash dhartī se bhī ham ne DhūñDh nikāle patthar

na jaane kah ga.e kyā aap muskurāne meñ
hai dil ko naaz ki jaan aa ga.ī fasāne meñ

ek muddat se baaġh duniyā kā
apne dil meñ lagā rahā huuñ maiñ

nazar kyā mil ga.ī us kī nazar se
tamannā dil meñ koī ab nahīñ hai

har ik samt balāoñ kā ik hujūm sā hai
tamām hausle ab dil ko āzmāne haiñ

ek harf-e-rāz dil par aa.ina hotā huā
ik kohar chhā.ī huī manzar-ba-manzar aur maiñ

dil meñ ye ek Dar hai barābar banā huā
miTTī meñ mil na jaa.e kahīñ ghar banā huā

detā hai ab yahī dil-e-shorīda mashvara
jiine se tañg ho to miyāñ mar ke dekh lo

iltiyām is kā jo hai lutf-e-butāñ par mauqūf
zaḳhm-e-dil kā mire hotā nahīñ marham paidā

asar-e-āh-e-dil-e-zār kī afvāheñ haiñ
ya.anī mujh par karam yaar kī afvāheñ haiñ