Tags-Dil

kabhī jāda-e-talab se jo phirā huuñ dil-shikasta
tirī aarzū ne hañs kar vahīñ Daal dī haiñ bāñheñ

sohbat rakhā kiyā vo safīna-o-zalāl se
dil hī meñ ḳhuuñ huā kiiñ mirī nukta-dāniyāñ

rah jaa.e chand roz jo bīmār-e-ġham ke paas
ḳhud apnā dil dabā.e hue chāra-gar phire

lo ahl-e-jahāñ naved-e-farhat
maa.il hai dil apnā aḳhz-e-ġham par

'sālik' se liyā hai tum ne dil muft
yaañ aur bhī bechte haiñ kam par

pur-soz jigar ke naale bhī dil-soz nikalte rahte haiñ
haañ sham.a bhī jaltī rahtī hai parvāne bhī jalte rahte haiñ

ġhurbat meñ vatan aur ahl-e-vatan kī yaad jab aa jaatī hai mujhe
dil hai ki taḌaptā rahtā hai aur ashk bhī Dhalte rahte haiñ

adā se dekh lo jaatā rahe gila dil kā
bas ik nigāh pe Thahrā hai faisla dil kā

sitam vo tum ne kiye bhūle ham gila dil kā
huā tumhāre bigaḌne se faisla dil kā

bahār aate hī kunj-e-qafas nasīb huā
hazār haif ki niklā na jo sila dil kā

jo ye nishāna uḌā do to samjheñ tīr-fagan
bahut hai nāvak-e-mizhgāñ se fāsla dil kā

ilāhī ḳhair ho kuchh aaj rañg be-Dhab hai
Tapak rahā hai ka.ī din se aabla dil kā

chalā hai chhoḌ ke tanhā kidhar tasavvur-e-yār
shab-e-firāq meñ thā tujh se mashġhala dil kā

vo riñd huuñ ki mujhe hathkaḌī se bai.at hai
balā hai gesū-e-jānāñ se silsila dil kā

phirā jo kūcha-e-kākul se koī pūchheñge
sunā hai luT gayā raste meñ qāfila dil kā

ummīd-e-sub.h meñ kartā huuñ chaak dāman-e-shab
junūñ meñ roz nikālā hai mashġhala dil kā

vo zulm karte haiñ ham par to log kahte haiñ
ḳhudā bure se na Daale mo.āmla dil kā

hazār fasl-e-gul aa.e junūñ vo josh kahāñ
gayā shabāb ke hamrāh valvala dil kā

ḳhudā ke haath hai apnā ab ai 'qalaq' insāf
butoñ se hashr meñ hogā muqābla dil kā

ho saktī hai paidā koī tabḳhīr kī sūrat
dil tañg-o-pareshān bhī ho saktā hai is se