Tags-Dil

kaañp rahe haiñ zālim sultāñ TuuT ga.e dil jabbāroñ ke
bhaag rahe haiñ zill-e-ilāhī muñh utre haiñ ġhaddāroñ ke

dard kā diip jaltā rahā dil kā sonā pighaltā rahā
ek Duube hue chāñd ne raat bhar ḳhuuñ rulāyā mujhe

Dhab dekhe to ham ne jaanā dil meñ dhun bhī samā.ī hai
'mīrā-jī' daanā to nahīñ hai āshiq hai saudā.ī hai

jab dil ghabrā jaatā hai to aap hī aap bahaltā hai
prem kī riit ise jaano par honī kī chaturā.ī hai

aise Dole man kā bajrā jaise nain-bīch ho kajrā
dil ke andar dhuum machī hai jag meñ udāsī chhā.ī hai

is zamāne meñ na ho kyūñkar hamārā dil udaas
dekh kar ahvāl-e-ālam uḌte jaate haiñ havās

sipurd kar ke kisī ko makān-e-dil 'shahzād'
ḳhud apne-āp ko be-ḳhānumāñ banānā hai

rañg aur ruup meñ sone se kharī hotī hai
dil kī vo rag jo mohabbat se bharī hotī hai

arsh-o-kursī-o-falak dair-o-haram ka.aba-e-dil
phir bhī mahdūd tirī jalvagarī hotī hai

hai kā.enāt mire dil kī dhaḌkanoñ meñ asiir
maiñ ek zarra bisāt-e-nizām-e-shamsī par

muñh pe khātā hai ye is tarah se talvār ki bas
dil mirā ishq meñ aisā hai jigar-dār ki bas

nahīñ rahā haram-e-dil meñ ik sanam bātil
tire ḳhayāl ke lāt-o-manāt kī saugand

darīda-dil hai koī shahr meñ hamārī tarah
koī durīda-dahan shaiḳh-e-shahar ke mānind

shi.ār kī jo mudārāt-e-qāmat-e-jānāñ
kiyā hai 'faiz' dar-e-dil dar-e-falak se buland

kuchh dil-ḳharāsh sher kahe aur chal basā
haañ zindagī meñ itnī hī mohlat milī mujhe

hijr meñ nāshād duniyā se dil-e-muztar gayā
aaj apne saath kā ik marne vaalā mar gayā

maiñ kabhī royā to vo bole Duboyā nām-e-ishq
aur agar aañsū pī liye to dil meñ dariyā bhar gayā

ātish-e-ishq bhaḌak uTThī hai paimāne maiñ
kaun sī aag lagī dil meñ ye anjāne meñ

jaatī huī rut kab ruktī hai ai dil ye abas tadbīreñ haiñ
jo qaid havāoñ ko kar leñ kyā aisī bhī kuchh zanjīreñ haiñ

dil vahī ashk-bār rahtā hai
ġham se jo ham-kanār rahtā hai