Tags-Discrimination

pāsbān-e-gulistāñ bante haiñ aur
imtiyāz-e-sho.ala-o-shabnam nahīñ

saudā-e-ishq zulf-e-siyah jis ke sar meñ hai
kab mutlaq imtiyāz use nafā o zarar meñ hai

dil to bahut liye haiñ tum ne har ek jā se
is mere dil kā sāhab kuchh imtiyāz karnā

aa.ī nigār-e-ġham kī sadā 'hosh' ham chale
tum imtiyāz-e-sūd-o-ziyāñ dekhte raho

imtiyāz-e-man-o-tū jab nahīñ rahtā hai 'jalīl'
vaqt aisā bhī mohabbat meñ zarūr aatā hai

dil-guzārī bhī liye hai imtiyāz-e-husn-o-ishq
ḳhuun ro detā huuñ maiñ aur ashk pī jaate ho tum

tam.īz-e-lāla-o-gul se hai nāla-e-bulbul
jahāñ meñ vā na koī chashm-e-imtiyāz kare

mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare

mujhe piirī aur shabāb meñ jo hai imtiyāz to is qadar
koī jhoñkā bād-e-sahar kā thā mire paas se jo guzar gayā

miTā jab imtiyāz-e-kufr o īmāñ
makān-e-kāba kyā baitus-sanam kyā

imtiyāz-e-sūrat-o-ma.anī se begāna huā
aa.ine ko aa.ina hairāñ ko hairāñ dekh kar

mushkil hai imtiyāz-e-azāb-o-savāb meñ
piitā huuñ maiñ sharāb milā kar gulāb meñ

go āsmān par bhī uḌā tū to kyā huā
maiñ kaun huuñ kahāñ huuñ ye bhī imtiyāz kar

apnī ḳhabar kahāñ unheñ jin pe khulā hai rāz-e-ishq
saare shu.ūr miT ga.e jab huā imtiyāz-e-ishq

imtiyāz-e-kufr-o-īmāñ vaqt par ho jā.egā
dāvat-e-mai-ḳhāna ālamgīr honī chāhiye

zarā ai dil mohabbat kā tarāna tez-tar kar de
abhī kuchh imtiyāz-e-kāfir-o-dīñ-dār baaqī hai

har kisī se na ehtirāz karo
dost dushman meñ imtiyāz karo

tere jalvoñ ne miTāyā imtiyāz-e-roz-o-shab
dekhtā huuñ māh-e-nau bhī mehr-e-ālam-tāb bhī

qafas meñ rah ke mujhe ye bhī imtiyāz nahīñ
kise ḳhizāñ kise fasl-e-bahār kahte haiñ

barte kuchh imtiyāz to insān kam se kam
ho apne dostoñ kī to pahchān kam se kam