Tags-Aangan

ghar kī tanhā.ī jab āñgan ho ga.ī
ye sitāre kyā qayāmat Dhā ga.e

sadā.eñ bikhrī paḌī haiñ tamām āñgan meñ
nazar nazar meñ ye manzar hai aur sab chup haiñ

mujh ko supurd-e-ḳhāk karo is duā ke saath
āñgan meñ phuul khilte raheñ aur makāñ rahe

gūñgā āñgan hai bahrī dīvāreñ
ye ḳharāba hai apnā ghar shāyad

us ke āñgan meñ raushnī thī magar
ghar ke andar baḌā añdherā thā

har taraf thī baḌī mahkār mere āñgan meñ
apne phūloñ ke liye merī chamelī chup hai

qayām tā.iro kuchh der mere āñgan meñ
tamām ghar ko mire ḳhush-gavār karte chalo

amīr-e-shahr ke āñgan meñ jab ujāle hue
na jaane kitne gharoñ ke charāġh kaale hue

nadiyā parbat chāñd nigāheñ maalā ek ka.ī daane
chhoTe chhoTe se āñgan bhī kosoñ phaile lagte the

phuul khileñge gulshan meñ
diip jaleñge āñgan meñ

maiñ vo gul huuñ jo mahaktā to hai āñgan meñ mire
jis kī ḳhushbū ne zamāne ko diyā kuchh bhī nahīñ

sab khaḌe the āñgan meñ aur mujh ko takte the, baar baar
ghar se jab maiñ niklā thā mujh ko rokne vaalā kaun thā

terī hastī ek furāt sahī par tū ne
mere to āñgan ko karbal kar rakkhā hai

sañg barsā de mere āñgan meñ
rahravoñ ko gul-o-samar de de

sab ke āñgan jhāñkne vaale ham se hī kyuuñ bair tujhe
kab tak terā rasta dekheñ saarī raat ke jaage ham

abhī to aas ke āñgan meñ kuchh ujālā hai
salone chāñd judā.ī ke bādaloñ meñ na Duub

jab vaqt kī dahlīz pe shab kaañp rahī thī
sho.ala sā mire jism ke āñgan se uThā thā

javāb kyuuñ haiñ sabhī ḳhāmoshī meñ dubke hue
savāl zehn ke āñgan meñ aatā jaatā huā

mahfiloñ meñ ham rafīq-o-rāz-dāñ samjhe ga.e
ghar ke āñgan meñ magar tanhā.iyāñ bote rahe

bulā lete haiñ tārīkī vo apne ghar ke āñgan meñ
ujāle kyuuñ magar saare pas-e-dīvār karte haiñ