Tags-Dosti

nāmūs dostī se gardan bañdhī hai apnī
jiite haiñ jab talak ham tab tak nibāhte haiñ

havāoñ se dostī na karnā
luTā na denā chaman kī ḳhushbū

zarā sī dostī kī ham se qāfiyoñ ne kiyā
kiyā ġhazal ne hameñ ḳhāndān meñ shāmil

yahī zindagī gulistāñ yahī zindagī hai zindāñ
isī zindagī se maiñ ne yūñhī dostī nibāhī

ye zulm hai ki mire shahar kā jo qātil hai
hazār jaan se vo dostī ke qābil hai

ab tark-e-dostī hī taqāzā hai vaqt kā
terā qayās gar hai yahī to qayās kyā

samjhā.eñ kis tarah dil-e-nā-kardā-kār ko
ye dostī samajhtā hai dushman ke pyaar ko

huā ham pe ab un kā saaya harām
thī jin bādaloñ se kabhī dostī

dostī kaisī rah-o-rasm-e-umūmī bhī ga.ī
pyaar kī baat kahī aap se taqsīr mirī

ik taraf zabānoñ par dostī ke na.are haiñ
ik taraf Tapaktā hai ḳhuun āstīnoñ se

ḳhulūs-e-dostī par marne vaale
hayāt-e-jāvidāñ tak aa ga.e haiñ

'mehr' hirbā se dostī tā-chand
ġham nahīñ rañg ke badalne kā

ḳhatīb-e-shahr ne kī baat dostī kī magar
diloñ meñ tuḳhm adāvat ke bo ga.e alfāz

dhundlī dhundlī sī fazā hai mehr aur iḳhlās kī
ab rifāqat āshtī aur dostī gumnām hai

ba.az chehre bahut hasīn sahī
phir bhī kitnoñ se dostī kī jaa.e

dostī chāhat vafā is daur meñ
kaam rakh ai dost apne kaam se

hai taqāza vaqt kā kyā kījiye
dushmanoñ se dostī hai aaj kal

dostī meñ fāsle hote nahīñ
pyaar meñ ye tajziye hote nahīñ

ajiib dastūr-e-āshiqī hai na maiñ hī maiñ huuñ na tum hī tum ho
na dostī dostī kī sūrat na dushmanī dushmanī kī sūrat

na dostī kā use mile phal na koī marbūt hove us se
ki jis ne kar dushmanī ḳhudāyā jo rabt aapas meñ thā chhuḌāyā