Tags-Dosti

hotī hai ek dushmanī o dostī kī had
is had ke ba.ad zahmat-e-lafz-o-bayāñ kahāñ

maiñ ne to saarī umr nibhā.ī hai dostī
vo mujh se khā ke merī qasam bhī nahīñ milā

vo mujh se bhartā thā dum dostī kā lekin jab
adū se haath milāyā to aañkh bhar aa.ī

nāla-o-āh-o-fuġhāñ kyuuñ na huuñ hamdam apne
dostī ishq ko hai roz-e-azal se ham se

tarīq un kā hī sulh-e-kul hai jo be-hama bā-hama nazar haiñ
hameñ ye bartāv ne dikhāyā ki dostī meñ bhī dushmanī hai

dostī ko aam karnā chāhtā hai
ḳhud ko vo nīlām karnā chāhtā hai

tirī dostī kā kamāl thā mujhe ḳhauf thā na malāl thā
mirā rom rom thā hairatī mirā dil bhī mahv-e-dhamāl thā

jab vo detā hai dostī meñ fareb
dil mirā aab aab hotā hai

ye merā dil hī jāntā hai kitnā sañg-dil hai vo
ki mujh se apnī dostī baḌhā baḌhā ke chal diyā

ye dostī kā taqāzā hai is ko dhyān meñ rakh
hamesha fāsla thoḌā sā darmiyān meñ rakh

ab dostī nahīñ na sahī dushmanī sahī
koī to rābte kī kaḌī darmiyān chhoḌ

aap se kyā dostī hone lagī
apne dil se dushmanī hone lagī

vaqt to jaatā rahā par baat baaqī rah ga.ī
hai ye jhūTī dostī ab ham ne jaanī aap kī

merī bechārgī to ye bhī hai
aap kī dostī se Dartā huuñ

ulfat na karūñgā ab kisī kī
dushman huā jis se dostī kī

un se bhī merī dostī un se bhī ranjisheñ
siine meñ ek halqa-e-ahbāb aur hai

dostī jab kisī se kī jaa.e
dushmanoñ kī bhī raa.e lī jaa.e

ḳhatar hai rishta-e-ulfat rag-e-gardan na ho jaave
ġhurūr-e-dostī aafat hai tū dushman na ho jaave

mohabbatoñ meñ dikhāve kī dostī na milā
agar gale nahīñ miltā to haath bhī na milā

unheñ qarīb na hone diyā kabhī maiñ ne
jo dostī meñ hadeñ bhuul jaane vaale the