Tags-Dosti

miT rahī thī tishnagī baḌh rahī thī dostī
phir anā kī teġh kyuuñ be-niyām ho ga.ī

dostī jab kisī se kī jaa.e
dushmanoñ kī bhī raa.e lī jaa.e

thī nigāh pahle to us kī vuuñ kahīñ dostī meñ huā hai yuuñ
diyā us ne dil kahīñ aur kyuuñ yahī 'mus.hafī' kā gunāh hai

hai har ek baat meñ ab kajī ki chalan nikāle haiñ aur hī
na vo rabt hai na vo dostī na vo rasm hai na vo raah hai

na vo va.ada-e-sar-e-rāh hai na vo dostī na nibāh hai
na vo dil-farebī ke haiñ chalan na vo pyārī pyārī nigāh hai

guftugū karne lage ret ke ambār ke saath
dostī ho ga.ī āḳhir mirī ashjār ke saath

lā-ta.alluq huuñ us ta.alluq se
aur ye dostī rahegī abhī

ġham rāt-din rahe to ḳhushī bhī kabhī rahī
ik bevafā se apnī baḌī dostī rahī

manzūr dostī jo tumheñ hai har ek se
achchhā to kyā muzā.eqa 'inshā' se kiiñ sahī

dost kahtā huuñ tumheñ shā.er nahīñ kahtā 'shu.ūr'
dostī apnī jagah hai shā.erī apnī jagah

kitnī mahfūz zindagī thī kabhī
dushmanī thī na dostī thī kabhī

dostī meñ hai bajā 'pankaj' savāl-e-shauq bhī
hotī hai yaarī magar qurbān jaane ke liye

har ek shaḳhs meñ andāz-e-kaj-adā.ī hai
magar ye dil hai ki rah rah ke dostī māñge

zamāna tā-ba-abad un ko bhar nahīñ saktā
jigar pe khaa.e haiñ vo zaḳhm-e-dostī maiñ ne

zamāna dostī par in hasīnoñ kī na itrā.e
ye ālam-dost aksar dushman-e-ālam bhī hote haiñ

koī to dostoñ se mire dostī kare
koī to mehrbāñ ho balāoñ ko Taal de

be-hisī insān kā hāsil na ho
dostī ho ret kā sāhil na ho

tum ko to kuchh zarūr nahīñ pās-e-dostī
haañ ye zarūr hai ki zarūrat mujhī ko hai

tirī vafā mirī nas nas meñ zahr bhar degī
ye dostī bhī tirī dushmanī na ban jaa.e

sar-e-dayār-e-vafā dostoñ ke jhurmuT meñ
darīda jism liye dostī nazar aa.ī