Tags-Duniya

na jaane lafz kis duniyā meñ kho.e
tumhāre sāmne gūñgā huā maiñ

jise apnā samajhte the vahī dil ho gayā un kā
koī duniyā meñ ab kis kā bharosā kar ke din kaaTe

na.ī duniyā mujassam dilkashī ma.alūm hotī hai
magar is husn meñ dil kī kamī ma.alūm hotī hai

jidhar dekhā 'nushūr' ik ālam-e-dīgar nazar aayā
musībat meñ ye duniyā ajnabī ma.alūm hotī hai

ek duniyā ko giraftār-e-ġham-e-jāñ dekhā
yuuñ na hotā to tamāshā nazar aate ḳhud ko

zubūñ hai is qadar duniyā kī hālat
hamārā ġham bhī ḳhasta ho gayā hai

kaun jā ke samjhā.e ḳhud-parast duniyā ko
kyā sanam-parastī hai kyā ḳhudā-parastī hai

tujhe bhulā.ūñ ki maiñ ḳhud ko bhuul jā.ūñ yahāñ
ḳhayāl-o-ḳhvāb kī duniyā satā rahī hai mujhe

saarī duniyā ke ta.alluq se jo sochā jaatā
aadmī itne qabīloñ meñ na bāñTā jaatā

har qadam par ham ko duniyā roktī hī rah ga.ī
ek jazba thā jo tere āstāñ tak aa ga.e

kuchh is ke sañvar jaane kī tadbīr nahīñ hai
duniyā hai tirī zulf-e-girah-gīr nahīñ hai

ek ḳhvāb-o-ḳhayāl hai duniyā
e'tibār-e-nazar ko kyā kahiye

nahīñ hotī ye harjā.ī kisī kī
to kyuuñ duniyā hamārī ho rahī hai

īmān-o-kufr aur na duniyā-o-dīñ rahe
ai ishq-e-shād-bāsh ki tanhā hamīñ rahe

jā aur koī zabt kī duniyā talāsh kar
ai ishq ham to ab tire qābil nahīñ rahe

ek aañsū na bahā.ūñ ġham-e-duniyā ke liye
ġham-e-jānāñ ke liye haiñ mire saare aañsū

sarshār huuñ sarshār hai duniyā mire aage
kaunain hai ik larzish-e-sahbā mire aage

maiñ aur Darūñ saulat-e-duniyā-e-danī se
ḳhud larza-bar-andām hai duniyā mire aage

pahlū meñ hai ik zohra-jabīñ haath meñ sāġhar
is vaqt na duniyā hai na uqbā mire aage

pahle ḳhud ko to samjhā le auroñ ko samjhāne vaale
tū bhī ḳhud meñ ik aalam hai maiñ bhī ḳhud meñ ik duniyā huuñ