Tags-Duniya

ghar ke bāhar DhūñDhtā rahtā huuñ duniyā
ghar ke andar duniyā-dārī rahtī hai

maiñ ne saarī duniyā meñ bas ek hasīna dekhī hai
baaqī koī husn nahīñ hai charba hai shahzādī kā

zindagī rāh-e-vafā meñ jo miTā dete haiñ
naqsh ulfat kā vo duniyā meñ jamā dete haiñ

batāne lagā raat būḌhā faqīr
ye duniyā hamesha se kañgāl hai

tamannā kī tarah tark-e-tamannā bhī musībat hai
ye duniyā ik maqām-e-imtihāñ yuuñ bhī hai aur yuuñ bhī

is baar dil ke raste hamla karegī duniyā
sarhad banā rahā huuñ faulād ho rahā huuñ

thoḌā bahut mujhe bhī sunñe lagī hai duniyā
terī zabāñ se shāyad irshād ho rahā huuñ

yaañ ḳhaak kā zarra bhī laġhzish se nahīñ ḳhālī
mai-ḳhāna-e-duniyā hai yā ālam-e-be-hoshī

maiñ hī tanhā huuñ faqat terī bharī duniyā meñ
aur bhī log haiñ kyā mere ḳhudā merī tarah

kisht-e-dil ko chaaT legā kirm-e-duniyā aur phir
bach rahegā kuchh to vo sail-e-havā le jā.egā

mirī āñkhoñ se haT kar kuchh nahīñ hai
tirī duniyā kā manzar kuchh nahīñ hai

vo ho duniyā ki lahad yā ki ho roz-e-mahshar
mubtalā-e-ġham-e-jānāñ kahīñ āzād nahīñ

maiñ bachā lūñgā tujhe duniyā ke sard-o-garm se
Dhāñp le mujh se badan apnā tirī chādar huuñ maiñ

maiñ aaj tak nahīñ maanā huuñ terī duniyā ko
tū maan jaa.e to maiñ us ko maan jā.ūñgā

duniyā sab kuchh jaan ga.ī hai mere baare meñ
bint-e-alam ne nā-mahram se parda chhoḌ diyā

jitnī burī kahī jaatī hai utnī burī nahīñ hai duniyā
bachchoñ ke schōl meñ shāyad tum se milī nahīñ hai duniyā

duniyā ke sāmne kabhī phailā.ūñ apne haath
parvardigār itnā bhī majbūr tū na kar

ye hai nasheb-o-farāz-e-duniyā abas hai is kā ḳhayāl karnā
jahāñ meñ hote haiñ yuuñ hī jamghaT kabhī idhar ko kabhī udhar ko

rab hai uupar zamīn par duniyā
beach meñ hai bahut dhuāñ shāyad

tamāshā.ī bane rahiye tamāshā dekhte rahiye
yahī duniyā hai to kab tak ye duniyā dekhte rahiye