Tags-Duniya

'mohsin' use qabā kī zarūrat na thī magar
duniyā ko roz-o-shab ke doshāle to de gayā

na rahtī ḳhabar diin o duniyā kī 'hasrat'
jo sote unheñ be-ḳhabar dekh lete

hamārī aañkh ke aañsū kī apnī duniyā hai
kisī faqīr ko shāhoñ kā Dar nahīñ hotā

duniyā jise kahtā hai zamāna 'fānī'
hai ek tilism ijtimā azdād

duniyā se mel kī zarūrat hī nahīñ
mujh ko is khel kī zarūrat hī nahīñ

apnī kahānī dil meñ chhupā kar rakhte haiñ
duniyā vāloñ ko hairān nahīñ karte

ishq ne roz-e-azal hī kar diyā thā faisla
phir kahāñ duniyā ke kahne se sudhar jā.eñge ham

'farhat-ehsās' apne shāgirdoñ meñ shāmil kar hameñ
varna is duniyā se yūñhī ba-hunar jā.eñge ham

nākām hasratoñ ke sivā kuchh nahīñ rahā
duniyā meñ ab dukhoñ ke sivā kuchh nahīñ rahā

ye duniyā to kyā hai sar-e-arsh-e-āzam
ham apnā hī naqsh-e-qadam dekhte haiñ

havā khilānī thī duniyā kī merī mayyat ko
uThāne vaale jo kāñdhā badal badal ke chale

gulshan meñ le ke chal kisī sahrā meñ le ke chal
ai dil magar sukūn kī duniyā meñ le ke chal

duniyā kī talab hī se na fursat huī varna
armān tire dar kī gadā.ī ke bahut the

tajsīm kar ki ḳhvāb kī duniyā hai jāvedāñ
taslīm kar ki ālam-e-fānī fareb hai

ai 'zauq' hosh gar hai to duniyā se duur bhaag
is mai-kade meñ kaam nahīñ hoshiyār kā

yuuñ aap bigaḌne ko bigḌeñ lekin ye zarā socheñ samjheñ
kyā sirf hamīñ ne ishq kiyā duniyā ne kiyā aalam ne kiyā

duniyā ko Duboyā ashkoñ se tūfān uThāyā ro ro kar
dariyā-e-ġham ulfat meñ bapā ai 'nūh' talātum ham ne kiyā

thī āqibat kī ḳhāmushī tanhā.iyoñ kī chīḳh
duniyā ye kah rahī thī mirā vaqt mar gayā

har ik tifl-e-qalam ye sochtā hai
maiñ kal duniyā se behtar likh rahā huuñ

nazar aatī nahīñ jo dil kī duniyā
use manzar-ba-manzar likh rahā huuñ