Tags-Dushmani

tum ko fareb-e-ġhair se āgāh kar diyā
varna mujhe kisī se koī dushmanī nahīñ

tarīq un kā hī sulh-e-kul hai jo be-hama bā-hama nazar haiñ
hameñ ye bartāv ne dikhāyā ki dostī meñ bhī dushmanī hai

apne begāne se ab mujh ko shikāyat na rahī
dushmanī kar ke mire dost ne maarā mujh ko

dostoñ se dil kā rishta kaash ho kuchh is tarah
dushmanī ke saa.e meñ bhī dostī baaqī rahe

dushmanī aap kī ināyat hai
ham faqat dostī ke mujrim haiñ

ḳhudā ke vāste mauqa.a na de shikāyat kā
ki dostī kī tarah dushmanī nibhāyā kar

hasīnoñ se faqat sāhib-salāmat duur kī achchhī
na un kī dostī achchhī na un kī dushmanī achchhī

qafas meñ chup na hoñ to kyā karūñ ki ye qaidī
na dostī ke liye hai na dushmanī ke liye

ta.ajjub hai ḳhulūs-e-dostāñ par
nahīñ ġham dushmanoñ kī dushmanī kā

kuchh na kuchh 'manzūr' dil se rābta rah jā.egā
us ko mujh se dostī yā dushmanī taḌpā.egī

raazī haiñ ham ki dost se ho dushmanī magar
dushman ko ham se dost banāyā na jā.egā

marnā mirā ilaaj to be-shak hai soch luuñ
ye dostī se kahte haiñ yā dushmanī se aap

talqīn-e-sabr dil se to koī dushmanī na thī
dekhā ye haal qābil-e-sharh-o-bayāñ na thā

ban ga.ī jaan par mohabbat meñ
dostī ban ke dushmanī aa.ī

laag bhī dil se hai lagāv ke saath
dushmanī bhī hai dostī hī nahīñ

dushmanī ham se ho nahīñ saktī
tujh se sharminda kīna-var haiñ ham

na dostī se rahe aur na dushmanī se rahe
hameñ tamām gile apnī āgahī se rahe

is kī yādoñ se kahāñ hai dushmanī
sham.a jaltī shām-e-furqat kam se kam

ġhairoñ kī dostī par kyuuñ e'tibār kiije
ye dushmanī kareñge begāne aadmī haiñ

sabhoñ se miltā huuñ begāna-e-talab ho kar
na dostī se ġharaz hai na dushmanī se mujhe