Tags-Aankh

hijāb-e-mahmil-e-lailā ko tū uThā na sakā
ki terī aañkh meñ dīdār kā shu.ūr nahīñ

mere libās-e-kohna se haTtī nahīñ hai un kī aañkh
shāyad ulajh ga.ī nazar jāma-e-tār-tār meñ

kuchh ḳhud meñ kashish paidā kar lo ki mahfil tum se aañkh bhare
ye chaal baḌe ayyār kī hai ye chaal na ḳhālī jā.egī

haa.e ye un kā tarz-e-mohabbat
aañkh se bas ik buuñd girā dī

lipTā jo us se ḳhvāb meñ maiñ aañkh khul ga.ī
kaam ai qusūr-e-ḳhvāb banā par bigaḌ gayā

dekhnā koī sar-e-arsh se taarā TuuTā
yā hasīñ aañkh se zālim kī girā dil merā

lahū ko aañkh meñ rahne kā zom thā varna
Tapak bhī saktā thā bahlā ke dil ke tūfāñ ko

pyaar se aañkh bhar aatī hai kañval khilte haiñ
jab kabhī lab pe tirā nām-e-vafā aatā hai

vo kab rahne detā hai mujh ko akelā 'tūr'
aañkh ik nīlam sī shab bhar chamkātā hai

un kī yādoñ se huī nam aañkh ko
aap duniyā se chhupānā sīkhiye

vo kyā badan bhar ḳhafā thā mujh se
ki aañkh bhī chup gumān bhar thī

dekh lī tere nashe meñ jo gulābī āñkheñ
aañkh ko sharm se le nargis-e-bīmār jhukā

maiñ añdheroñ ko ujālūñ aise
tīrgī aañkh kā kājal ho jaa.e

baat is aañkh meñ poshīda hai vo 'arsh' ki jo
lab se nikle to mire siine pe paikāñ ho jaa.e

ḳhushnumā dīvār-o-dar ke ḳhvāb hī dekhā kiye
jism sahrā zehn vīrāñ aañkh giilī ho ga.ī

mujh se mat pūchh ''mire husn meñ kyā rakkhā hai''
aañkh se parda-e-zulmāt uThā rakkhā hai

zindagī shab ke jazīroñ se udhar DhūñDte haiñ
aañkh meñ ashk jo chamkeñ to sahar DhūñDte haiñ

aañkh lagtī hī nahīñ niiñd kahāñ se aa.e
niiñd aatī nahīñ kahne ko to so letā huuñ

lagā hai aisā koī kāsa-e-savālī hoñ
ye aañkh jaise mirī raushnī se ḳhālī hoñ

kabhī to aañkh kī pyaas bujhā
kabhī to dil kā patthar toḌ