Tags-Aankh

ik baar sāmnā huā aur aañkh laḌ ga.ī
itnī sī baat thī magar afsos baḌh ga.ī

aur matā-e-jān-o-dil kuchh bhī na mujh ko chāhiye
siine meñ ik charāġh sā aañkh meñ ik lahū rahe

aañkh uThāo to hijābāt kā ik aalam hai
dil se dekho to koī raah meñ haa.il bhī nahīñ

milā diyā hai pasīna bhale hī miTTī meñ
ham apnī aañkh kā paanī bachā ke rakhte haiñ

dil kā bojh kiyā halkā
aañkh ab bojhal hai sāhab

uḌ ga.ī niiñd aañkh se kis kī
lazzat-e-ḳhurd-o-ḳhvāb baaqī hai

kisī aañkh meñ nahīñ ashk-e-ġham tire ba.ad kuchh bhī nahīñ hai kam
tujhe zindagī ne bhulā diyā tū bhī muskurā use bhuul jā

bante hī shahr kā ye dekhiye vīrāñ honā
aañkh khulte hī mirā dahr meñ giryāñ honā

jaane vaale mujhe kuchh apnī nishānī de jā
ruuh pyāsī na rahe aañkh meñ paanī de jā

āvāz jo maiñ duuñ to kisī aur ko chhū le
is āñkh-micholī se vo bezār hī kab thā

merī aañkh ke taare ab na dekh pāoge
raat ke musāfir the kho ga.e ujāloñ meñ

maiñ ne bhī āñkheñ dekhī haiñ pariyoñ kī jaao bhī
tum ne dikhā.ī aañkh mujhe aur maiñ Dar gayā

aañkh jhapkī thī tasavvur bañdh chukā thā yaar kā
chauñkte hī hasrat-e-dīdār kā daftar khulā

mujh ko bhātā hī nahīñ ik aañkh husn-e-kā.enāt
haañ magar vo jo tire ruḳhsār ke ik til meñ hai

mausam-e-gul se fasl-e-ḳhizāñ kī duurī kyā
aañkh jhapakte saarā qissa paak huā

dil ke vīrān rāste bhī dekh
aañkh kī maar se pare bhī dekh

aañkh dasht-e-ārzū ho jaa.e to
ḳhvāb ko dariyā meñ palnā chāhiye

vo ham haiñ ahl-e-mohabbat ki jaan se dil se
bahut buḳhār uThe aañkh shabnamī na huī

aañkh khulte hī bastiyāñ tārāj
koī lazzat nahīñ hai ḳhvāboñ meñ