Tags-Aankh

ghar se hamārī āñkh-mīcholī rahī sadā
āñgan nahīñ milā to kabhī dar nahīñ milā

jab aa.ī josh pe mere karīm kī rahmat
girā jo aañkh se aañsū dur-e-yagāna huā

yuuñ lagā aañkh bachāne pe jhapaktī hai palak
usī tasvīr pe maiñ ne bhī nigāheñ rakh diiñ

zindagī aag hai aur aag kī ḳhātir ham ne
diip kī aañkh meñ jaltā huā chehrā dekhā

aap kī aañkh se gahrā hai mirī ruuh kā zaḳhm
aap kyā soch sakeñge mirī tanhā.ī ko

ek pal bas ek pal dekhā thā us mahtāb ko
aañkh ke parde meñ bas vo ek hī pal qaid thā

jo tumhārī aañkh se gir paḌā jo tumhāre dil se utar gayā
vo ġharīb jīte-jī mar gayā vo kahāñ gayā vo kidhar gayā

dekhā unheñ to dekhne se jī nahīñ bharā
aur aañkh hai ki kitne hī ḳhvāboñ se bhar ga.ī

us ne dekhā hī nahīñ varna ye aañkh
dil kā ahvāl kahā kartī hai

aañkh lagtī nahīñ 'jur.at' mirī ab saarī raat
aañkh lagte hī ye kaisā mujhe āzār lagā

masal hai aañkh bachī maal dostoñ kā huā
zamāna daulat-e-duniyā kā hai ḳhayāl kā vaqt

ek duzdīda-nazar se mirā dil chhīn ke vaah
tum kidhar ko mirī jaañ aañkh bachā ke uTThe

sitāre siskiyāñ bharte hai shab-bhar
kabhī to aañkh bhī ġham kā pata de

guhar jab aañkh se Tapkā zamīñ meñ jazb huā
vo ek lamha baḌā bā-vaqār guzrā thā

maiñ hī maiñ huuñ aañkh uThtī hai jidhar bhī ab
nā-mālūm bhī mālūm samajh meñ aayā

paas jab tak vo rahe dard thamā rahtā hai
phailtā jaatā hai phir aañkh ke kājal kī tarah

idhar to aañkh barastī hai dil dhaḌaktā hai
ye sānehāt tumhāre yahāñ nahīñ hote

aañkh khultī hī nahīñ hai jis tarah
un kā sote meñ nazārā kar liyā

mirī to aañkh mirā ḳhvāb TūTne se khulī
na jaane paañv dharā niind meñ kahāñ maiñ ne

kuchh bādal kuchh chāñd se pyāre pyāre log
Duub ga.e jitne the aañkh ke taare log