Tags-Aankh

aañkh kā shahr ho ābād to dil kī bastī
aap hī aap se vīrān sī ho jaatī hai

tum ne chhīnā hai mire dil kā diyā aañkh kī lau
in añdheroñ meñ bhī pahchān sī ho jaatī hai

kis kā ġham khaa.e jā rahā hai tumheñ
aañkh kyuuñ hai ye nam december meñ

hamārī aañkh 'shanāvar' huī hai kyā namnāk
suḳhan-sarāoñ se zehrā-jabīñ chale ga.e haiñ

dhund se paar bhī kaam kareñgī apnī nazreñ
aañkh ke sāmne se ye bādal chhaT jā.eñge

ham ḳhud ko ābād kareñge apne dil meñ
tere āñkh-jazīre se ab kaT jā.eñge

vo jis ne aañkh atā kī hai dekhne ke liye
usī ko chhoḌ ke sab kuchh dikhā.ī detā hai

dar-e-umīd se ho kar nikalne lagtā huuñ
to yaas rauzan-e-zindāñ se aañkh mārtī hai

shikāyat us kī kyā tujh se ye apnī apnī qismat hai
ki merī aañkh ko aañsū mile tū ne hañsī paa.ī

huā hai mān-e-dīdār-e-yār parda-e-chashm
khulī jo aañkh to kuchh darmiyāñ hijāb nahīñ

jab se kholī hai aañkh duniyā meñ
ek hī dhun savār rahtī hai

vo jitne bhes badle maiñ use pahchān lūñgī
ki maiñ ne aañkh meñ us shaḳhs kā naqsha rakhā hai

mirī pāgal tabī.at kā hai koī pair na sar
nahīñ dariyā milā to aañkh meñ sahrā rakhā hai

Duube hue tāroñ pe maiñ kyā ashk bahātā
chaḌhte hue sūraj se mirī aañkh laḌī thī

gaatā huuñ mere sur meñ sur mil jaa.e us kī lahroñ kā
merī aañkh meñ aañsū dekhe to phir apnī aañkh bhare dariyā

shikasta ḳhvāb kī kircheñ paḌī haiñ aañkh meñ shāyad
nazar meñ chubhtā hai jab tab adhūrā sā vo manzar bhī

ek taraf rū-e-jānāñ thā jaltī aañkh meñ ek taraf
sayyāroñ kī raakh meñ miltī raat thī ik bedārī kī

ashk yuuñ bahte haiñ sāvan kī jhaḌī ho jaise
yā kahīñ pahle-pahal aañkh laḌī ho jaise

khulī hai aañkh kahāñ kaun moḌ hai yaaro
dayār-e-ḳhvāb kī baaqī nahīñ nishānī bhī

ravā-ravī meñ lage aañkh kis tarah se 'nazīr'
musāfiroñ ko kahāñ aise iztirāb meñ ḳhvāb