Tags-Aankh

maiñ kahā ek adā kar to lagā kahne ''ūñ-hūñ''
dekh Tuk aañkh churā kar to lagā kahne ''ūñ-hūñ''

maiñ aañkh meñ muntaqil karūñ raushnī ko 'zīshān'
magar ye behtar hai dhuup kā in.ikās kar luuñ

vo aañkh merī thī jo us ke sāmne nam thī
ḳhamosh vo thā ki yaum-e-nushūr merā thā

hashr ke din bhī rahī baat vahī aañkh vahī
jhūTe va.adoñ se tujhe sharm zarā bhī aa.ī

kahīñ charāġh jalā raushnī kahīñ pahuñchī
khulī thī aañkh kahīñ zindagī kahīñ pahuñchī

aah ye mehrbāniyāñ terī
shādmānī kī aañkh pur-nam hai

is tund-ḳhū se jūñhī mirī aañkh laḌ ga.ī
is dil se aur aql se vohīñ bigaḌ ga.ī

aañkh meñ ḳhema-zan nīl-gūñ vus.ateñ apnā pahlā qadam hī ḳhalāoñ meñ hai
jo jafā ke jazīra-numāoñ meñ hai dil kā us ḳhāk-e-ḳhasta se naatā rahā

aañkh ne dekhā sar-e-shām vo manzar 'fartāsh'
karnā chāhūñ bhī to tasvīr nahīñ kar saktā

dil ḳhuuñ ho shab-e-vasl bhī hasrat meñ na kyūñ-kar
dekheñ na vo ḳhalvat meñ bhī jab aañkh uThā ke

ho aañkh meñ surūr to kyā mai-kade se kaam
sāġhar meñ kuchh nahīñ hai sharāboñ meñ kuchh nahīñ

ye safar paañv hilāne kā nahīñ aañkh kā hai
maiñ ne is baab meñ rukne ko masāfat likkhā

ham yuuñ hī mar jā.eñge kaafī hai ishāra aap kā
aañkh ko ḳhanjar na abrū ko kaTārī kījiye

tūfāñ ne bhī aañkh khol dī hai
sāhil bhī nazar bachā rahā hai

mirī dāstāñ kā uruuj thā tirī narm palkoñ kī chhāñv meñ
mire saath thā tujhe jāgnā tirī aañkh kaise jhapak ga.ī

nigāh-e-nāz aksar dāstāñ ma.alūm hotī hai
kisī kī aañkh ham-vasf-e-zabāñ ma.alūm hotī hai

parda paḌā huā hai mirī aañkh par talab
yā barq-o-āftāb ke aage kuchh aur hai

bhar ke nazar yaar na dekhā kabhī
jab gayā aañkh hī bhar kar gayā

qazā huā hai ek jism-e-be-tarah
kahīñ hamārī aañkh be-vazū na ho

kis aañkh se nazzāra kareñ lāla-o-gul kā
taqdīs-e-nazar bā.is-e-ilzām hai ab bhī