Tags-Aankh

ġhanīmat hai ye diid va dīd-e-yārāñ
jahāñ aañkh muñd ga.ī na maiñ huuñ na tū hai

vo raat ki jis ke kināroñ par ham milte aur bichhaḌte the
ik baar mujhe tanhā pā kar us kī bhī aañkh bhar aa.ī thī

baras bhī jaa.e vo bādal to kis ko pardā hai
lahū to aañkh se phir bhī nikalne vaalā hai

be-numūd dard kī numā.ish kyoñ
dil se kartī hai aañkh sāzish kyoñ

maiñ ġhazal kī shabnamī aañkh se ye dukhoñ ke phuul chunā karūñ
mirī saltanat mirā fan rahe mujhe tāj-o-taḳht ḳhudā na de

maiñ udāsiyāñ na sajā sakūñ kabhī jism-o-jāñ ke mazār par
na diye jaleñ mirī aañkh meñ mujhe itnī saḳht sazā na de

samundar aañkh se ojhal zarā nahīñ hotā
nadī ko Dar kisī chaTTān kā nahīñ hotā

andar kā hī na ho zarā bāhar bhī dekh le
dil ḳhuun hai to aañkh pe ḳhūnīñ samāñ na khol

maiñ tere Dar se na dekhā udhar bahut shab-e-vasl
sitāra-e-saharī mujh ko aañkh maar rahā

muddat se rahī farsh tirī rāhguzar meñ
tab jā ke sitāroñ se kahīñ aañkh laḌī hai

har dil jo hai betāb to har ik aañkh bharī hai
insān pe sach-much koī uftād paḌī hai

pathrā ga.ī thī aañkh magar band to na thī
ab ye bhī intizār kī sūrat nahīñ rahī

ḳhayāl kyā hai jo alfāz tak na pahuñche 'sāz'
jab aañkh se hī na Tapkā to phir lahū kyā hai

lab pe fariyād na hai aañkh meñ qatra koī
vādi-e-shab meñ nahīñ ham-safar apnā koī

kab talak is hijr meñ āḳhir ko ronā chāhiye
aañkh bhī ḳhuuñ ho ga.ī dāman bhī ab galne ko hai

dil meñ armān-e-visāl aañkh meñ tūfān-e-jamāl
hosh baaqī nahīñ jaane kā magar jaate haiñ

baḌe sukūn se dekhā hai jalte lamhoñ ko
hamārī aañkh meñ varna dhuāñ kahāñ na paḌā

Tiile se qahqahoñ kī phuvāroñ meñ the 'ġhanī'
tiir ek aañkh vaale achānak uchhal ga.e

ḳhvāb ik parinda hai
aañkh ke qafas meñ ye

hosh aate hī hasīnoñ ko qayāmat aa.ī
aañkh meñ fitnagarī dil meñ sharārat aa.ī