Tags-Ehsaan

dopahar maidān garmī habs abr-e-be-matā
sar-nigūñ hai ḳhār-o-ḳhas par ik gul-e-fīroza-fām

'hālī' dil-e-insāñ meñ hai gum daulat-e-kaunain
sharminda hoñ kyuuñ ġhair ke ehsān-o-atā se

yaad aayā mujhe us shaḳhs kā jaanā 'nāsir'
jis kī sharminda-e-ehsān hai raftār-e-ḳhayāl

apnoñ ne to me.ār-e-vafā hī na batāyā
is raah meñ ehsān tumhāre bhī bahut haiñ

martā jo hijr meñ to na miltā maiñ yaar se
mujh par 'huzūr' bas ki hai ehsān-e-zindagī

āḳhir kyuuñ ehsān kiyā hai zinda rakhne kā
ham jo mar jaate to banda-parvar achchhe the

ham rañj bhī paane par mamnūn hī hote haiñ
ham se to nahīñ mumkin ehsān-farāmoshī

merī ḳhuddārī ne ehsān kiyā hai mujh par
varna jo jaate haiñ darbār meñ kho jaate haiñ

zaḳhm ḳhūñ-ālūd haiñ aañsū dhuāñ dete hue
ye suhāne se namūne haiñ tire ehsān ke

qalb-o-nazar meñ nuur na.e tajraboñ kā hai
ehsān kis qadar ye badaltī rutoñ kā hai

dām-e-ġham-e-hayāt meñ uljhā ga.ī umiid
ham ye samajh rahe the ki ehsān kar ga.ī

ai mish.al-e-ummīd ye ehsān kam nahīñ
tārīk shab ko tū ne daraḳhshāñ banā diyā

ehsān tirā dil mirā kyā yaad karegā
jo ḳhaak ko us kī na tū barbād karegā

ye hai ki jhukātā hai muḳhālif kī bhī gardan
sun lo ki koī shai nahīñ ehsān se behtar

farār ho ga.ī hotī kabhī kī ruuh mirī
bas ek jism kā ehsān rok letā hai

kabhī kabhī kitnā nuqsān uThānā paḌtā hai
airoñ ġhairoñ kā ehsān uThānā paḌtā hai

junūn-e-mohabbat meñ dīvāngī meñ tirī be-ruḳhī kā bhī maiñ qadr-dāñ huuñ
baḌā tū ne ehsān mujh par kiyā ye tamāshā banā kar tamāshā na dekhā

rafīq-e-zindagī thī ab anīs-e-vaqt-e-āḳhir hai
tirā ai maut ham ye dūsrā ehsān lete haiñ

tujhe ghāTā na hone deñge kārobār-e-ulfat meñ
ham apne sar tirā ai dost har ehsān lete haiñ

nā-gavārā hai hameñ ehsān-e-sāhab-daulatāñ
hai zar-e-gul bhī nazar meñ jauhar-e-faulād yaañ