Tags-Etibaar

kiyā jo tum ne apne dil se pūchho
hamārā e'tibār aa.e na aa.e

vajūd par inhisār maiñ ne nahīñ kiyā thā
ki ḳhaak kā e'tibār maiñ ne nahīñ kiyā thā

havā-e-shab kā nahīñ e.atibār ai 'shā.ir'
hazār niiñd ho āñkheñ magar khulī rakhnā

abad talak hue ham us ke vasvasoñ ke asiir
kiyā thā jis pe kabhī e'tibār ek minute

aap jo kuchh qarār karte haiñ
kahiye ham e'tibār karte haiñ

sochne kā koī natīja nahīñ
saaya hai e'tibār-e-sāya nahīñ

hazār shukr ki niklā vo sādiqul-iqarār
tumheñ 'hafīz' kī bātoñ kā e'tibār na thā

kahā ye kis ne ki vaade kā e'tibār na thā
vo aur baat thī jis se mujhe qarār na thā

vufūr-e-shauq se āñkhoñ meñ ruuh khich aa.ī
payām-e-maut thā va.ade kā e'tibār mujhe

na.e karishme dikhātā hai e'tibār mujhe
ḳhizāñ hai ālam-e-nairañgī-e-bahār mujhe

is faisle pe luT ga.ī duniyā-e-e.atibār
sābit huā gunāh gunahgār ke baġhair

rishtoñ kā e'tibār vafāoñ kā intizār
ham bhī charāġh le ke havāoñ meñ aa.e haiñ

maiñ dard-e-furqat se jāñ-ba-lab huuñ tumheñ yaqīn-e-vafā nahīñ hai
mujhe nahīñ e'tibār apnā tumheñ nahīñ e'tibār merā

ek ḳhvāb-o-ḳhayāl hai duniyā
e'tibār-e-nazar ko kyā kahiye

terā yaqīn terā amal tere valvale
hastī kā e'tibār haiñ tū jaag to sahī

aalam jab ek haal pe qaa.em nahīñ rahe
kyā ḳhaak e'tibār-e-nigāh-e-yaqīn rahe

o nañg-e-e.atibār duā par na rakh madār
o bevaqūf himmat-e-mardāna chāhiye

firāq lamhoñ ko ham ne hasīñ banāyā hai
sajā ke dil meñ tire e.atibār kā mausam

kuchh to paimān-e-yār meñ guzrī
aur kuchh e'tibār meñ guzrī

us manzil-fareb se guzrā huuñ maiñ jahāñ
apnā bhī e'tibār na karnā paḌā mujhe