Tags-Etibaar

gosh ik muddat se mahrūm-e-samā.at hai magar
dil ajab nādāñ hai ab tak e'tibār-e-naġhma hai

qayāmat aa.e to un ko bhī aate aate aa.egā
vo jin ko tere va.ade par nahiñ hai e'tibār ab tak

tere qaul-o-qarār kī bāteñ
kuchh nahīñ e'tibār kī bāteñ

jo ek thā ai nigāh tū ne hazār kar ke hameñ dikhāyā
yahī agar kaifiyat hai terī to phir kise e'tibār hogā

nahīñ hai mo'atabar jo apnā vasf ḳhud bayāñ kare
ai jān-e-e'tibār us pe terā shak bhī ḳhuub hai

khulā hai dar pa tirā intizār jaatā rahā
ḳhulūs to hai magar e'tibār jaatā rahā

zindagī tujh ko e'tibār nahīñ
apne hone kī maiñ gavāhī duuñ

na muñh chhupā ke jiye ham na sar jhukā ke jiye
sitamgaroñ kī nazar se nazar milā ke jiye

kisī pe karnā nahīñ e'tibār merī tarah
luTā ke baiThoge sabr o qarār merī tarah

ik us kī zaat se jab merā e'tibār uThā
to phir kisī pe bhī aayā na e'tibār mujhe

falak kī sulh ko samjhe raho 'vaqār' jidāl
bane bhī dost jo dushman to e'tibār kahāñ

nazar se dāman bachā bachā ke maiñ dil ko aarif banā rahā huuñ
tumhāre jalvoñ kī manziloñ meñ nigāh kā e'tibār kyā hai

umīd-e-fardā pe jiine vaalo hayāt kā e'tibār kyā hai
uTho ki manzil bulā rahī hai chalo ki ab intizār kyā hai

zindagī kā kuchh e'tibār nahīñ
maut ke sau bahāne hote haiñ

paḌā hai ḳhud se vāsta aur is ke ba.ad
kisī kā e'tibār bhī nahīñ rahā

dam-ba-ḳhud hai tere aage e'tibār-e-aql-o-hosh
hosh vaale jab baḌhe had se to dīvāne bane

rafāqatoñ ke na.e ḳhvāb ḳhushnumā haiñ magar
guzar chukā hai tire e'tibār kā mausam

dil ko ḳhushī bhī had se ziyāda nahīñ milī
kaase ke e'tibār se ġham bhī nahīñ milā

nahīñ e'tibār ek dam zindagī kā
azal se qazā ke havāle hue haiñ

ab ki jab jānāna tum ko hai sabhī par e'tibār
ab tumheñ jānāna pe jab e'tibār aayā to kyā