Tags-Faramoshi

ḳhush huuñ is vāda-farāmoshī se
us ne hañs kar to kahā bhuul gayā

jhelnā hai hameñ phir karb farāmoshī kā
phir vahī silsila-e-yād hamāre liye hai

agar un ke taġhāful ko hai da.avā apnī tamkīñ kā
hamārī ḳhud-farāmoshī ko hai naaz apne nisyāñ par

chaman meñ vo farāmoshī kā mausam thā maiñ ḳhud ko bhī
zamīñ par barg-e-āvāra nazar aayā to yaad aayā

sadqa mai-ḳhāne kā saaqī mujhe be-hoshī de ḳhud-farāmoshī de
yuuñ to sab kahte haiñ 'bedam' tirā mastāna tirā ab huuñ dīvāna tirā

hai ḳhud-farāmoshī pe ġhālib ḳhud-farebī kī chubhan
takrār se ta.abīr haiñ ye zindagī ke māh-o-san

hichkiyāñ aatī haiñ par lete nahīñ vo merā naam
dekhnā un kī farāmoshī ko merī yaad ko

dil giraftār-e-tazabzub hai kidhar ko jaa.e
ghar bhī yaad aatā hai aur dasht-e-farāmoshī bhī

jism-o-jāñ Duub ga.e ḳhvāb-e-farāmoshī meñ
ab koī baat burī ho ki bhalī yaad nahīñ

ham zūd-farāmoshī ke liye badnām bahut haiñ phir bhī 'bashar'
jab jab bhī chalī madmātī pavan uḌtā huā āñchal yaad aayā

maiñ musāfir huuñ bayābān-e-farāmoshī kā
apne naqsh-e-kaf-e-pā se bhī shanāsā.ī nahīñ

ajab shai ḳhud-farāmoshī hai 'kaifī'
surāhī hai subū hai aur maiñ huuñ

kyā sochtī ho
dīvār-e-farāmoshī se udhar kyā dekhtī ho

hamārī ḳhud-farāmoshī ye duniyā jaan jā.egī
zarā sā aur is daldal meñ dhañsnā rah gayā baaqī

yā alam-koshī rahī yā ḳhud-farāmoshī rahī
dil kisī din dil na thā yā dard thā yā kuchh na thā

rahā karte haiñ qaid-e-hosh meñ ai vā.e-nākāmī
vo dasht-e-ḳhud-farāmoshī ke chakkar yaad aate haiñ

bahut ġhalat hai tamannā-e-ḳhud-farāmoshī
vafūr-e-ishq meñ apnī ḳhabar zarūrī hai

vo din haiñ yaad ki barsoñ thī ḳhud-farāmoshī
ye dhun kisī kī thī apnā bhī kuchh ḳhayāl na thā

farāmoshī hai lekin yaad rakhtā hai tire dar ko
dar-e-aġhyār par 'sāqib' kabhī saa.il nahīñ hotā