Tags-Aarzoo

maa.il karam pe hai magar allāh re ehtiyāt
paimān-e-ārzū se mire bad-gumāñ bhī hai

kuchh nāz-e-tamkanat bhī hai pās-e-hayā ke saath
phir bār-e-ārzū se zarā sargirāñ bhī hai

ḳhushbū ke thāmne ko baḌhā.e haiñ haath 'adā'
dāmān-e-ārzū bhī sabā-pairahan sā hai

vo āñkheñ jin meñ ḳhvāb haiñ
vo dil hai jin meñ aarzū

sāz-e-ārzū chup hai ruuh meñ hai sannāTā
dil meñ jo bhī sūrat hai ab miTī miTī sī hai

ye aarzū bhī vaqt ke dhāre meñ bah ga.ī
ab naañ sahī kabhī vo hamārā to hogā nā

ġham-e-hāsil muqayyad kar rahā hai sa.ī-e-hāsil ko
mazāq-e-ārzū dīvār-e-zindāñ hai jahāñ maiñ huuñ

'kausar' ho tujh ko ḳhud se jo milne kī aarzū
apne ko apne aap meñ kho kar talāsh kar

jism-o-jāñ se miT ga.ī har aarzū
ik tirī ummīd tah-ba-tah ga.ī

aarzū dil kī thī dil meñ rah ga.ī

sahar huī na mire shahr-e-ārzū meñ kabhī
ki mehr-e-husn kī kirneñ pas-e-naqāb rahīñ

dhuup ne jab aarzū ke jism ko nahlā diyā
ban ga.ī thiiñ tum vafā kā sā.ebāñ achchhī to ho

aarzū ko salām karte haiñ
dil kā qissa tamām karte haiñ

aarzū hī rah ga.ī 'majrūh' kahte ham kabhī
ik ġhazal aisī jise tasvīr-e-jānāna kaheñ

tumhārī aarzū ko mil gayā ghar
hamārī hasrateñ be-ghar huī haiñ

yā terī aarzū mujhe le aa.ī is taraf
yā merā shauq raah meñ sahrā bichhā gayā

naġhmagī aarzū kī bikhrī hai
raat sharmā rahī hai apne se

kaun sī hai vo aarzū ki 'salām'
aaj bhī tishna-lab nahīñ dil meñ

gulshan-e-hasrat-o-ārzū kī jab kalī koī khulne pe aa.ī
bād-e-sarsar ne maare tamāñche is ḳhatā par ki kyuuñ muskurā.ī