Tags-Aarzoo

qadam qadam pe hai ḳhuddārī-e-hayāt kā Dar
mirī zabān pe kyā harf-e-ārzū aa.e

ishq kī sāda-dilī hai har taraf chhā.ī huī
bārgāh-e-husn meñ har aarzū nau-ḳhez hai

uḌā diye ḳhas-o-ḳhāshāk-e-ārzū sar-e-rāh
bas ek dil ko tire iḳhtiyār meñ rakkhā

vo aarzū ki dil se zabāñ tak na aa sake
kuchh is kā tazkira bhī mirī jaañ kareñge ham

abhī na pūchho ki lāla-zāroñ se uTh rahā hai dhuāñ vo kaisā
magar ye dekho ki phuul banñe kā ārzū-mand ḳhaar kyā hai

ragoñ meñ sirf tamavvuj kī aarzū kyā hai
jo inqalāb na laa.e to phir lahū kyā hai

garche paudā abhī huñ chhoTā sā
aarzū dil meñ hai mire kyā kyā

bas ki thī rone kī aadat vasl meñ bhī yaar se
kah ke apnā aap hāl-e-ārzū rone lagā

ye jhāñk letī hai andar se ārzū-ḳhāna
havā kā qad mirī dīvār se ziyāda hai

chāñdnī meñ sāya-hā-e-kāḳh-o-kū meñ ghūmiye
phir kisī ko chāhne kī aarzū meñ ghūmiye

tāqat-e-jumbish-e-nazar bhī nahīñ
ab ho kyā sharh-e-ārzū mujh se

ḳhushbū kī aarzū meñ sazā qaid kī huī
sahrā uThā ke laa.e to pūchhā nahīñ gayā

be-jān-o-be-takallum ik aarzū hai tanhā
jañgal meñ jaise koī vīrān sī imārat

uljhā rahā aarzū meñ ġhāfil
kyuuñ ḳhud hī na ban gayā tamannā

dete ho payām-e-ārzū tum
jab tark maiñ kar chukā tamannā

numūd-e-rañg-o-bū ne maar Daalā
usī kī aarzū ne maar Daalā

TuuTā tilism-e-ahd-e-mohabbat kuchh is tarah
phir aarzū kī sham.a firozāñ na kar sake

din chhupā aur ġham ke saa.e Dhale
aarzū ke na.e charāġh jale

aarzū hai ki tū yahāñ aa.e
aur phir umr bhar na jaa.e kahīñ

hai aarzū ye koī to aisā dikhā.ī de
jo be-hisī ke daur meñ apnā dikhā.ī de