Tags-Aashiq

vo sañg-dil huā hai ik sañg-dil pe āshiq
aatā hai jī meñ sar ko pathroñ se phoḌ Dālūñ

mirā gul-rū banā hai ishq o bū ko
ho āshiq yā na ho bolo na bolo

us but-e-be-dīñ kī zulfoñ kā ishāra hai yahī
is balā meñ vo phaseñ āshiq hoñ jo allāh ke

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

suḳhan mirā kaif-e-dil hai 'nātiq' vo qadr karte haiñ jo ho āshiq
nahīñ hai ye falsafa kitābī ye iktisābī hunar nahīñ hai

bālīn par bhī zālim Tuk yak nazar na dekhā
āshiq ne jaan dī to par kyā hī hasratoñ se

javāb-e-nāma nahīñ gar to rakh do nāma-e-yār
jo pūchheñ qabr meñ āshiq se kuchh javāb to de

bhalā Tuk sub.h hone do ise bhī dekh leveñge
kisī āshiq ke rone se nahīñ rakhtī ḳhabar shabnam

qatl ko āshiq ke añgusht-e-ishārat kar buland
terī añgusht-e-ishārat hai shahādat kā alif

nahīñ mumkin lab-e-āshiq se harf-e-mudda.ā nikle
jise tum ne kiyā ḳhāmosh us se kyā sadā nikle

muftī-e-nāz ne diyā fatvā
ḳhūn-e-āshiq halāl kartā hai

sach ishq meñ haiñ āshiq o ma.ashūq barābar
jo mushkil-e-majnūñ hai so hai mushkil-e-lailā

haqārat apne āshiq kī nahīñ māshūq ko bhātī
'bayāñ' sa.ī apnī rusvā.ī meñ tā maqdūr mat kiijo

raushnī ḳhāna-e-āshiq kī hai tujh se varna
tū na ho to shab-e-mahtāb kise bhātī hai

kyā Dar hai agar us ne dar se mujhe uThvāyā
kahte haiñ taġhayyurī meñ āshiq kī bahālī hai

āshiq jahāñ huā hai be-Dhañgiyāñ hī kī haiñ
is 'mīr'-e-be-ḳhirad ne kab Dhab se dil lagāyā

behāl kahe na jaane dūñgā
āshiq huuñ nāma-bar nahīñ huuñ

anokhī vaz.a hai saare zamāne se nirāle haiñ
ye āshiq kaun sī bastī ke yā-rab rahne vaale haiñ

bahār aa.ī mubārak āshiq-o-māshūq ko milnā
ki kaliyāñ phūTtī haiñ bulbuloñ ke par nikalte haiñ

sham-e-mahfil huuñ na āshiq na maiñ bū-e-gul huuñ
mah-jabīñ kyuuñ mujhe āñchal kī havā dete haiñ