Tags-Gham

vīrāñ dil meñ ġham ke priit bhaTakte the
merī chup par kisī sadā kā saayā thā

sham.a ghabrā na shab-e-ġham se ki koī dam meñ
tujh ko kāfūr-e-safedi-e-sahar detī hai

mumkin hai ashk ban ke rahūñ chashm-e-yār meñ
mumkin hai bhuul jaa.e ġham-e-rozgār meñ

manziloñ ke ba.ad dil us raaz kā mahram huā
dar-haqīqat vo ḳhushī thī naam jis kā ġham huā

kitne ḳhāke the hayāt-e-kāmrāñ ke zehn meñ
dil to is aalam meñ bhī masrūr thā jab ġham huā

haañ haañ mujhe tumhāre taġhāful kā ġham nahīñ
is daur-e-ḳhudravī meñ kise āzmā.e kaun

ġham se ziyāda aur na behtar lagā koī
unvān saiñkaḌoñ the mirī dāstān ke

hāl-e-ġham un se baar baar kahā
aur hañsī baar baar le Duubī

jalve haiñ un ke nau-ba-nau merī nigāh meñ
ab un ko ġham ye hai ġham-e-furqat nahīñ mujhe

raushnī mujh se gurezāñ hai to shikva bhī nahīñ
mere ġham-ḳhāne meñ kuchh aisā añdherā bhī nahīñ

ishq hai ġham jo sikhātā hai fanā ho jaanā
dard-e-dil hai jise aatā hai davā ho jaanā

ishq pyārā hai to ne.amat hai ġham-e-mahjūrī
in kā milnā hai mohabbat kā judā ho jaanā

saañs gintā huuñ tamannā meñ ki dekhūñ 'mānī'
ġham-e-dil kā adab-āmoz-e-fanā ho jaanā

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

jarāhat-tohfa almās-armuġhāñ dāġh-e-jigar hadiya
mubārakbād 'asad' ġham-ḳhvār-e-jān-e-dardmand aayā

uThā liyā thā jinheñ ġham ne shahr-e-mātam se
vo harf likkhe ga.e haiñ ḳhat-e-shakebā meñ

zindagī kaT rahī hai baḌe chain se
aur ġham hoñ to vo bhī atā kījiye

kyā kyā na zindagī ke fasāne raqam hue
lekin jo hāsil-e-ġham-e-dil the vo kam hue

ai tishnagī-e-dard koī ġham koī karam
muddat guzar ga.ī hai in āñkhoñ ko nam hue

tanhā.ī kī bojhal rāteñ pahle bhī to barsī thiiñ
zaḳhm nahīñ the itne qātil ġham itnā be-dard na thā