Tags-Ghar

rishtoñ ke bandhan ko toḌe aaj sajan ghar aa.ī huuñ
le kar kuchh yādoñ kī goyā bachpan kī ik peTī meñ

pahle har chiiz thī apnī magar ab lagtā hai
apne hī ghar meñ kisī dūsre ghar ke ham haiñ

ham ab bhī dasht meñ ḳhema lagā.e baiThe haiñ
hamāre hisse meñ apnā hī ghar nahīñ aayā

maiñ apne ghar ko bulandī pe chaḌh ke kyā dekhūñ
urūj-e-fan mirī dahlīz par utaar mujhe

vahshat-e-dil ye baḌhī chhoḌ diye ghar sab ne
tum hue ḳhāna-nashīñ ho ga.iiñ galiyāñ ābād

ḳhudā kā ghar hai but-ḳhāna hamārā dil nahīñ 'ātish'
maqām-e-āshnā hai yaañ nahīñ begāna aatā hai

matā-e-umr-e-guzishtā sameT kar le jā
jo ho sake to mirā dard apne ghar le jā

maġhrib mujhe khīñche hai to roke mujhe mashriq
dhobī kā vo kuttā huuñ ki jo ghaaT na ghar kā

saroñ pe haath apne ghar kī bosīda chhatoñ kā thā
magar mahfūz sā manzar hamāre āñganoñ kā thā

ḳhajil bahut huuñ ki āvārgī bhī Dhab se na kī
maiñ dar-ba-dar to gayā lekin apne ghar bhī gayā

ghar bane bigḌe, base ujḌe nagar har daur meñ
ek ye jañgal hī aisā hai ki jiyūñ-kā-tyūñ rahā

bharī hai rañj kī bārish se umr kī kārez
ham ek kone meñ baiThe haiñ ghir ke dekhte haiñ

ghar to bahā ke le gayā ḳhāshāk kī tarah
dariyā na chhoḌ mujh ko akelā ki maiñ bhī huuñ

kitnī dīvāreñ uThī haiñ ek ghar ke darmiyāñ
ghar kahīñ gum ho gayā dīvār-o-dar ke darmiyāñ

bastiyāñ 'maḳhmūr' yuuñ ujḌīñ ki sahrā ho ga.iiñ
fāsle baḌhne lage jab ghar se ghar ke darmiyāñ

jā ke sūraj se milā din meñ bhī ghar se niklā
ba.ad muddat maiñ charāġhoñ ke asar se niklā

vo bhī mahfil meñ chalī aa.ī hai pīchhe pīchhe
maiñ to ghar se isī tanhā.ī ke Dar se niklā

zauq-e-suḳhan ko ab to tere aag lagānā achchhā hai
muflis ghar kī hālat hai aur sher sunānā achchhā hai

tīr-e-nazar se aisā maare dil kā panchhī taab na le
duniyā ghar ke sayyādoñ se us kā nishāna achchhā hai

na to kaam rakhiye shikār se na to dil lagā.iye sair se
bas ab aage hazrat-e-ishq-jī chale jā.iye ghar hī ko ḳhair se