Tags-Haalaat

bahut soñ se achchhā huuñ phir bhī 'shu.ūr'
digar-gūñ nahīñ mere hālāt kam

kaun nā-vāqif-e-anjām-e-tabassum hai 'amīr'
mere hālāt pe ye kis ko hañsī aa.ī hai

mirī ummīd aksar chāhtī hai surḳh-rū honā
magar hālāt aksar mujh ko ā.īna dikhāte haiñ

āgāh kiyā hai to hue aur bhī ġhāfil
vāqif jo nahīñ the mire hālāt se aage

be-basar āfāt se taklīf hotī hai mujhe
sar-phire hālāt se taklīf hotī hai mujhe

kyā batāte haiñ ishārāt tumheñ kyā ma.alūm
kitne mashkūk haiñ hālāt tumheñ kyā ma.alūm

duniyā kā manshā hai pyāre ham ghuT ghuT kar mar jaa.eñ
dil kī dhaḌkan ye kahtī hai ik din badleñge hālāt

mujh ko ma.alūm hai aap majbūr haiñ aap mere liye muft rusvā na hoñ
aise hālāt meñ be-ruḳhī Thiik hai mujh ko is baat par koī hairat nahīñ

apne hālāt kā asiir huuñ maiñ
dard kī daulat-e-kasīr huuñ maiñ

vo ḳhaak bo.e the hālāt ne sharar jis meñ
ab us meñ phuul tamannā ke khilne vaale haiñ

zarā hālāt kyā badle hamāre
jo apnā thā parāyā ho rahā hai

ye gardish-e-hālāt kī hai zarra-navāzī
vo ḳhud hī mujhe aaj manāne chale aa.e

yuuñ mushtarak the ham sab har fard thā masāvī
phir bhī haiñ saare mushkil hālāt mere haq meñ

na kuchh kāġhaz meñ hai taane qalam ko dard nāloñ kā
likhūñ kyā ishq ke hālāt nā-mahram haiñ ye donoñ

tajziya hālāt kā ham har tarah karte rahe
jab samajh aajiz huī be-mā.egī achchhī lagī

oḌhī ridā-e-dard bhī hālāt kī tarah
tārīkiyoñ meñ Duub ga.e raat kī tarah

ham junūñ pesha ki rahte the tirī zaat meñ gum
ho ga.e silsila-e-gardish-e-hālāt meñ gum

haañ mire haal pe hañste haiñ zamāne vaale
aap to vāqif-e-hālāt haiñ aisā na kareñ

kaafī hai kyā ye kah denā
sab hālāt kī hai sañgīnī

na ye taqdīr kā likhā thā na manshā-e-ḳhudā
hādse mujh pe jo guzre mire hālāt meñ the