Tags-Haalaat

kah saktā thā kaun kisī se
vo shakl-e-hālāt huī thī

go saḳht nāgavār hai ghar baiThnā hameñ
kyā jaa.eñ is ḳharābī-e-hālāt meñ kahīñ

har koī yuuñ to hai bar-gashta-e-hālāt magar
har koī jiine kī har lahza duā māñge hai

shāḳh-e-hālāt se ab jhaaḌ bhī de tursh samar
talḳh hoñToñ pe koī taaza mazā aane de

us ko har haal meñ jiine kī adā aatī thī
vo na hālāt se hotā thā pareshāñ yaaro

nafi hue the sab isbāt
mere din mere hālāt

jāntā huuñ ki tumheñ pyaar nahīñ hai mujh se
kyā ba-majbūrī-e-hālāt ḳhafā hote ho

chup raheñ vaqt-e-mulāqāt ḳhafā hote ho
pūchh leñ bhuul se hālāt ḳhafā hote ho

ye javāñ ḳhuun siyah-rāt kā rahne degā
dukh meñ Duube hue hālāt na rahne degā

kab se hālāt-e-zamāna haiñ digar-gūñ lekin
dil kā mausam kisī hālat meñ badaltā hī nahīñ

kuchh ġham-e-jānāñ kuchh ġham-e-daurāñ donoñ merī zaat ke naam
ek ġhazal mansūb hai us se ek ġhazal hālāt ke naam

jis se chhā.ī huī hālāt kī zulmat chhaT jaa.e
tum to ḳhurshīd ho ḳhud se vo ujālā māñgo

dhuup hālāt kī ho tez to aur kyā māñgo
kisī dāman kī havā zulf kā saaya māñgo

likhā thā shā.ir-e-mashriq ne apne ḳhuun se jis ko
ajab hālāt haiñ ab vo tarāna bhuul jaatā huuñ

maiñ chal rahā huuñ bā-dil-e-nā-ḳhvāsta magar
hālāt kī giraft meñ patvār kī tarah

merī nā-kāmi-e-hālāt ke dhāre ke sivā
ek naddī bhī to be-āb na bahtī hogī

kyā jaane kyā rut badle hālāt kā koī Thiik nahīñ
ab ke safar meñ tum bhī hamāre saath chalo to behtar hai

har samt udāsiyāñ milī haiñ
hālāt se bas yahī gila hai

kabhī ġhanīm-e-jaur-o-sitam ke hāthoñ khaa.ī aisī maat
arz-e-alam meñ ḳhvār hue ham bigḌe rahe barsoñ hālāt

kise ma.alūm ye kashtī lage kis ghaaT par jā kar
bahā le jaa.e kyā jaane kidhar hālāt kā dariyā