Tags-Hawa

likkhā huā hai ḳhaas tumhāre hī haath kā
pahchāntā hai ḳhuub tumhārā ġhulām ḳhat

ba-rañg-e-bū-e-gul us baaġh ke ham āshnā hote
ki hamrāh-e-sabā Tuk sair karte phir havā hote

sau ruḳh se chūmtā hai tirā pairahan ḳhayāl
sab meñ huuñ merī jaan ye mauj-e-havā nahīñ

lahū meñ Duubā huā milā hai vafā kā har ik usuul tujh ko
maiñ jāntā huuñ pasand kyuuñ haiñ gulāb ke surḳh phuul tujh ko

aa ai mire chaman ki huā meñ tirī havā
sahrā-e-dil huā hai chaman-dar-chaman mujhe

ye tund-o-tez havā
tirī galī mire jañgal ko jo milātī hai

bhale bujhāne kī zid pe havā uḌī huī hai
magar charāġh kī lau aur bhī baḌhī huī hai

us ko patā nahīñ hai ḳhizāñ ke mizāj kā
vo vāqif-e-bahār huā hai abhī abhī

rakhā huā thā jis ko zamāne se duur duur
har lab pe us kā tazkira charchā usī kā thā

umr fariyād meñ barbād ga.ī kuchh na huā
naala mash.hūr ġhalat hai ki asar kartā hai

tiflī-o-javānī ḳhuub guzrī
do din achchhī havā rahī hai

ham bhī the kabhī javān rā.anā
apnī bhī kabhī havā rahī hai

ġhamoñ ke añdheroñ meñ ġharqāb huuñ maiñ
amāvas kā bikhrā huā ḳhvāb huuñ maiñ

baaġh meñ jab vo gul-e-tāza-bahār aatā hai
bū-e-gul phir to havā par hī dharī rahtī hai

kabhī Thahrī huī yaḳh-basta ġhamoñ kī jhīleñ
kabhī sahmā huā simTā huā ik pyaar āñkheñ

bas tabīb uTh jā mirī bālīñ se mat de dard-e-sar
kaam yaañ āḳhir huā ab fā.eda tadbīr kā

ek din tere jism kī rañgat
vaqt Dhaltā huā miTā degā

kyā pata thā ki jalte ghar ko mire
merā apnā sagā havā degā

vo jis kā saath nibhāne kā hausla na huā
bichhaḌ gayā to bhulāne kā hausla na huā

idhar udhar ke sunā.e hazār afsāne
diloñ kī baat sunāne kā hausla na huā