Tags-Hawa

kitnā mahdūd huā jaatā huuñ
maiñ ki har had se guzarnā chāhūñ

vāqi.a aam huā dhuup kī kirnoñ kī tarah
dekh le haath lagā kar mirī tābānī ko

kāñToñ meñ rakh ke phuul havā meñ uḌā ke ḳhaak
kartā hai sau tarah se ishāre mujhe koī

bikhrā huā huuñ vaqt ke shāne pe gard sā
ik zulf-e-pur-shikan huuñ sañvāre mujhe koī

huā hai shah kā musāhib phire hai itrātā
vagarna shahr meñ 'ġhālib' kī aabrū kyā hai

ham josh-e-javānī meñ aa kar ik lā-mahdūd safar meñ the
ma.alūm huā manzil ye na thī jab ghaaT kināre aa pahuñche

mausam kā lihāz hai havā ko
yūñhī to nahīñ rukī huī hai

bār-hā yuuñ bhī huā terī mohabbat kī qasam
jaan kar ham ne tujhe ḳhud se ḳhafā rakkhā hai

bahut dil ko satātā hai agar be-ḳhānumāñ honā
to kuchh lamhe havā meñ ghar banā kar dekh letā huuñ

vo dekhtā hai mire iztirāb ko hañs kar
maiñ tez-rau huuñ vo Thahrā huā samundar hai

miTā chale haiñ masāfat kā naqsh ahl-e-talab
havā saroñ meñ hai aur zer-e-pā samundar hai

havā ne chhīn liyā aa ke mere hoñToñ se
vo ek giit jo maiñ gungunā rahā thā abhī

likkhā hai mirā naam samundar pe havā ne
aur dono kī fitrat meñ sukūñ hai na vafā hai

har samt havā tez fazā tā-ba-ufuq tañg
dil zarra-e-sahrā hai bagūloñ meñ ghirā hai

havā chalī jo kabhī chauñk chauñk uThtā thā
tamām dasht hī jaise kisī ke dhyān meñ thā

karāhtā sā uThā koī TūTtā paikar
siyāhiyoñ meñ sulagtā huā dhuāñ jaise

imkāñ chahār sū thā safar kā magar 'qamar'
tanhā khaḌā huā thā koī ham-safar na thā

vaqt kī vahshī havā kyā kyā uḌā kar le ga.ī
ye bhī kyā kam hai ki kuchh us kī kamī maujūd hai

daraḳht-e-sabr-burīda sahī pe jānte haiñ
huā hai ye bhī ki us par samar nikal aa.e

charāġhoñ ko uchhālā jā rahā hai
havā par ro.ab Daalā jā rahā hai